ENGLISH

31 އޯގަސްޓު 2025

Advertisement

މިފްކޯގެ ސީއީއޯގެ ވައުދާ އެއްގޮތަށް ފުވައްމުލަކުން މަސް ގަންނަން ފަށައިފި

31 އޯގަސްޓު 2025

|

ޝާމަ ޝުޢައިބު

ފޮޓޯ: ސަރުކާރު.ކޮމް

ފުވައްމުލައް ސިޓީއަށް މިފްކޯގެ ސީއީއޯ، ފަރްހަތު ޝަހީރު ކުރެއްވި ދަތުރުފުޅުގައި، ރައްޔިތުންނަށް ވައުދުވީފަދައިން، އެ ކުންފުނިން އެ ސިޓީގެ ބަނދަރުން މަސް ގަންނަން ފަށައިފިއެވެ. 

މިފްކޯގެ ބޯޓު މިދިޔަ ބުރާސްފަތި ދުވަހު ވަނީ ފުވައްމުލައް ސިޓީގައި ބަނދަރުކޮށްފައެވެ. އަދި މިދިޔަ ހުކުރު ދުވަހުން ފެށިގެން ފުވައްމުލައް ސިޓީ އިން މަސް ގަންނަން މިފްކޯއިން ވަނީ ފަށާފައެވެ. 

އެ ކުންފުނިން ނެރުނު ބަޔާނެއްގައި ބުނީ މީގެ ފަހުން ފުވައްމުލަކުން ދާއިމީކޮށް މަސްގަތުމުގެ އިންތިޒާމު ހަމަޖެހިގެން ދާނެ ކަމަށެވެ. 

މީގެ އިތުރުން ފުވައްމުލައް ސިޓީގައި ގާއިމްކުރާ މަސް ޕްރޮސެސްކުރާ މަރުކަޒުގެ މަސައްކަތް މި އަހަރު ނިމުމުގެ ކުރިން ނިންމާ އެ ތަން އޮޕަރޭޝަނަށް ގެންނާނެ ކަމަށްވެސް މިފްކޯއިން ވަނީ ބުނެފައެވެ.

ފުވައްމުލަކުގައި ގާއިމްކުރާ މަސް ޕްރޮސެސްކުރާ މަރުކަޒު ނިމުމުން އެ ސިޓީގެ ރައްޔިތުންނަށް ޕްރޮސެސްކޮށްފައި ހުންނަ މަސް ގަންނަން ލިބޭނެ އިންތިޒާމު ވެސް ހަމަޖެހިގެން ދާނެ ކަމަށް މިފްކޯއިން ބުނެއެވެ.

މިފްކޯއިން ފުވައްމުލަކުން މަސް ގަންނަން ފަށާފައިވާއިރު ކުރިއަށް އޮތް މަހެއްހާ ދުވަހުގެ ތެރޭގައި ސީދާ އައްޑޫއަތޮޅުން މަސް އެކްސްޕޯރޓް ކުރުމުގެ މަސައްކަތް ފެށުމަށް ތައްޔާރުވަމުންދާކަމަށް މިފްކޯއިން ބުނެއެވެ.

މިފްކޯގެ ޖުމްލަ އުފެއްދުންތެރިކަން އިތުރުކުރުމަށްޓަކައި އަންނަނީ ގިނަ މަސައްކަތްކެއް ކުރަމުންނެވެ. އެގޮތުން މަސް ގަތުމާއި ރައްކާކުރުމުގެ ގާބިލުކަން އިތުރުކުރުމަށްޓަކައި، ސަރުކާރުގެ އެހީތެރިކަމާއެކު، މަލްޓި ލެޓެރަލް ޑިވެލޮޕްމަންޓް ފައިނޭންސްގެ އެހީގައި ކެޕޭސިޓީ އިތުރުކުރުމަށް ބޮޑެތި އިންވެސްޓްމަންޓްތަކެއް މިފްކޯއިން ވަނީ ކޮށްފައެވެ.

ކިޔުންތެރިންގެ ހިޔާލު