ސްރީ ލަންކާގައި ބޭއްވުމަށް ހަމަޖެހިފައިވާ ސައުތު އޭޝިއަން ސުޕަރ ކަޕް 2025 ފުޓްބޯޅަ މުބާރާތުގައި ވާދަކުރާ ރާއްޖޭގެ ސީނިއާ ޓީމުގެ ފަރިތަކުރުންތައް މިއަދު ފަށައިފިއެވެ.

އަންނަ ސެޕްޓެންބަރު މަހުގެ 4 އިން 10 ގެ ނިޔަލަށް ސްރީ ލަންކާގައި ކުރިއަށްދާ މުބާރާތުގައި އެ ޤައުމާ ދެކޮޅަށް ދެ މެޗެއް ކުޅުމަށް ހަމަޖެހިފައިވާއިރު، ރާއްޖޭގެ ސީނިއާ ފުޓްބޯޅަ ޓީމުގެ ޕްރިލިމިނަރީ ސްކޮޑެއް އެކުލަވާލީ މި މަހުގެ 26 ވަނަ ދުވަހު އެވެ.

ގަލޮޅު ރަސްމީ ދަނޑުގައި މިއަދު ބޭއްވި ފަރިތަކުރުންތައް ބައްލަވާލައްވަން އެފްއޭއެމްގެ ރައީސް، އަހުމަދު ޠާރިޤު ވަނީ ވަޑައިގެންފައެވެ. އަދި، ޤައުމީ ޓީމުގައި ހިމެނޭ ހުރިހާ ކުޅުންތެރިންނާ ޠާރިޤު ވަނީ ބައްދަލުކުރައްވާފައެވެ.

ލަންކާގައި ބާއްވާ މުބާރާތުގައި ވާދަކުރުމަށް އެކުލަވާލި ރާއްޖޭގެ 26 ކުޅުންތެރިންގެ ސްކޮޑުގައި ޒުވާން ޓީމުގެ ދެ ކުޅުންތެރިއަކު ވަނީ ހިމަނާފައެވެ. އެއީ، މުޙައްމަދު އިލާން އިމްރާން އާއި ހަސަން ރާއިދު އެވެ.

މީގެއިތުރުން، އަނިޔާގެ ސަބަބުން ދުވަސްތަކަކަށް ކުޅުމާ ދުރުގައި ހުރި ތަޖުރިބާކާރު ގޯލްކީޕަރު، މުޙައްމަދު ފައިސަލް ވެސް މި ފަހަރުގެ ސްކޮޑުގައި ހިމެނިއެވެ.

އެ މުބާރާތުގައި ރާއްޖޭން ލަންކާއާ ދެކޮޅަށް ނުކުންނާނީ އަންނަ މަހުގެ 6 ވަނަ ދުވަހާއި، 9 ވަނަ ދުވަހު އެވެ. މި މެޗުތަކުގައި ރާއްޖޭގެ ސީނިއާ ޓީމަށް އިރުޝާދު ދޭނީ، ދާދިފަހުން ޤައުމީ ޓީމުގެ ކޯޗުގެ މަޤާމަށް ހަމަޖެއްސި މުޙައްމަދު ޝިޔާޒް (މޯހަން) އެވެ.