އައިޓީއެފް މޯލްޑިވްސް ޖޫނިއާ އޯޕަން ޖޭ30 ޓެނިސް މުބާރާތުގެ އަންހެން ޑަބަލްސް އިވެންޓުގެ ޗެމްޕިއަންކަން ރާއްޖޭގެ އާރާ އާސަލް އާޒިމް އާއި ތައިލެންޑުގެ ޓަރީޓާ ހޮންގސްޔޮކްގެ ޕެއާ ހޯދައިފިއެވެ.

މި ފަހަރުގެ މޯލްޑިވްސް ޖޫނިއާ އޯޕަންގެ ފުރަތަމަ ހަފްތާގެ ޑަބަލްސް އިވެންޓް ކާމިޔާބުކުރީ ވެސް މި ދެ ކުޅުންތެރިންނެވެ. މިއީ ރާއްޖޭގެ ޖޫނިއާ ޓެނިސް ކުޅުންތެރިއަކަށް ލިބުނު ފަޚުރުވެރި ކާމިޔާބީއެކެވެ.

މާލޭ ޓެނިސް ކޯޓުގައި މިއަދު މެންދުރުފަހު ކުޅުނު ޑަބަލްސް ފައިނަލުގައި ދެކުނު ކޮރެއާގެ ސެއުންގޔުން ޗޯ އާއި ޗައިނާގެ ޔިޝާން ޒޫގެ ޕެއާގެ މައްޗަށް އާރާ އާއި ޓަރީޓާގެ ޕެއާ ކުރިހޯދީ ސީދާ ދެ ސެޓުންނެވެ. މެޗުގެ ސެޓުތައް އާރާ އާއި ޓަރީޓާގެ ޕެއާ ގެންދިޔައީ، 6-1، 6-3 އިންނެވެ.

މި މުބާރާތުގައި މިއަދު ހެނދުނު ކުރިއަށްދިޔަ އަންހެން ސިންގަލްސް ސެމީ ފައިނަލުގައި އާރާގެ ޑަބަލްސް ޕާޓްނަރު، ޓަރީޓާ ވަނީ ރާއްޖޭގެ ނަބާ ނިޝާން އަތުން ސީދާ ދެ ސެޓުން މޮޅުވެފައެވެ.

ގާތްގަނޑަކަށް ދެ ގަޑިއިރާއި ދިހަ މިނެޓަށް ދިގުދެމިގެންދިޔަ މި މެޗުގެ ފުރަތަމަ ސެޓު ފޯރިގަދަ ކުޅުމަކަށްފަހު ޓަރީޓާ ކާމިޔާބުކުރީ 7-6 އިންނެވެ. އެއަށްފަހު، ދެން ކުޅެވުނު ދެވަނަ ސެޓުގައި ޓަރީޓާ ކުރިހޯދީ 6-0 އިންނެވެ.

މި މުބާރާތުގައި މާދަމާ ކުރިއަށްދާނީ އަންހެން އަދި ފިރިހެން ސިންގަލްސް އިވެންޓުގެ ފައިނަލު މެޗުތަކެވެ. މުބާރާތުގެ އަންހެން ސިންގަލްސް ފައިނަލުގައި ތައިލެންޑްގެ ޓަރީޓާ ނުކުންނާނީ ކަޒަކިސްތާންގެ ޓަމާރާ އެރްމަކޯވާއާ ދެކޮޅަށެވެ. ފިރިހެން ސިންގަލްސް ފައިނަލުގައި ސްވިޒަލެންޑްގެ ޗާލީ ބާޒިލް ބައްދަލުކުރާނީ ޗައިނާގެ ޖިއަން ހުއާންގއާ އެވެ.

ރާއްޖޭގައި އެންމެފަހުން މިދިޔަ އަހަރު ބޭއްވި ޖޫނިއާ ދެ މުބާރާތް ކަމަށްވާ، އޭޓީއެފް މޯލްޑިވްސް އޯޕަން އާއި އޭޓީއެފް މޯލްޑިވްސް ޖޫނިއާ އޯޕަންގައި ދިވެހި ކުޅުންތެރިން ވަނީ ރަނގަޅު ކާމިޔާބީއެއް ހޯދައިފައެވެ.