ޒިންމާދާރު ނޫސްވެރިކަމަކަށް އިންތިހާއަށް މިއަދު މިވަނީ ބޭނުންވެފައި ކަމަށް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައެވެ.

ވަޒީރު ވިދާޅުވީ، ރަށްރަށަށް ވަޑައިގެން ރައީސުލްޖުމްހޫރިއްޔާ އުޅުއްވަނީ ވަރަށް ސާދާކޮށް ކަމަށާއި، މަގުމަތިން ހިންގަވާފައި ވަޑައިގަންނަވާއިރު ދިމާވާ އެކި އުމުރުފުރައިގެ މީހުންނާއި ކުޑަކުދިންނާ ބައްދަލު ކުރައްވައި، ސަލާންގަލާން ކުރައްވައި، ހާލުއަހުވާލު އައްސަވާ ކަމަށާއި، އެއީ، ރާއްޖޭގެ ގިނަ ބަޔަކު ވަރަށް އުފާވާ އަދި މަދުން ނޫނީ ނުފެންނަ ސިފައެއް ކަމަށެވެ.

އެހެންނަމަވެސް، މަގުމަތިން ރައީސުލްޖުމްހޫރިއްޔާއަށް ގަނާކޮށް، ފުރައްސާރަކޮށް، އެމަނިކުފާނުގެ ފުރާނައަށް ނުރައްކާވާގޮތަށް، ބަޔަކު މަގުމަތިން ރައީސުލްޖުމްހޫރިއްޔާއާ ދިމާކުރި މަންޒަރު އިއްޔެ ފެނިފައިވާ ކަމަށް އާދަމް ޝަރީފް ވިދާޅުވި އެވެ. އަދި ބަދަލު ހިފުމާއި ޒާތީ ތަޢައްޞަބުން ދުރުހެލިވެ، ފަސާދައާއި ފިތުނަވެރިކަން އެއްކިބާކޮށް، ޒިންމާދާރު ނޫސްވެރިކަމަކަށް އިންތިހާއަށް މިއަދު މިވަނީ ބޭނުންވެފައިވާ ކަމަށް ވަޒީރު ވިދާޅުވިއެވެ.

ވަޒީރު އާދަމް ޝަރީފް އިތުރަށް ވިދާޅުވީ، ރައްޔިތުންގެ މަޖިލީހާއި ސަރުކާރާއި ޝަރުއީ ނިޒާމު ޖަވާބުދާރީ ކުރުވަން އޮތް ބާރަކީ، ވީދެމުންދާ އިޖުތިމާއީ ފޭރާން ހަފުސްކުރާ ބަޔަކަށް ވެއްޖެ ނަމަ ގައުމުގެ ކުރިމަގު އުޖާލާ ނުވާނެ ކަމަށާއި، މި ގައުމަށް ސަހަރޯވެރިވެ، ގައުމު ހަމަމަގަަށް އަޅުވަން ތިބޭނީ ދިވެހި ރައްޔިތުން ކަމަށެވެ.