މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން އިންތިޒާމްކޮށްގެން ބާއްވާ، ދަ ނޭޝަނަލް ސްކިލްސް އެންޑް ކެރިއަރ އެކްސްޕޯ، "ދާލަން 2024" މިމަހު ބޭއްވުމަށް ނިންމައިފިއެެވެ. 

ހުޅުމާލޭ ސެންޓްރަލް ޕާކްގައި މިމަހު 15 އިން 16 ށް ކުރިޔަށް ގެންދާ މި އެކްސްޕޯގައި ދިވެހި ޒުވާނުންނަށް ކުރިމަގުގައި ހުރި ވަޒީފާގެ ފުރުސަތުތަކާއި، ވަޒިފާއަށް ތައްޔާރުވުމުގެ ގޮތުން ކުރަންޖެހޭ ކަންތައްތަކަށް އިސްކަންދިނުމަށް ނިންމަވާފައިވާކަމަށް އެ މިނިސްޓްރީއިން ބުނެއެވެ. މި އެކްސްޕޯގައި ކޮލެޖުތަކާއި، އިންސްޓިޓިއުޓްތަކާއި، ސަރުކާރުގެ ހިއްސާވާ ކުންފުނިތަކާއި، އިންޑަސްޓްރީގެ ބައިވެރިންގެ އިތުރުން އެކި މިނިސްޓްރީތަކުގެ ޑިޕާޓްމަންޓްތަކުން 45 އަށްވުރެ ގިނަ ސްޓޯލް ބައިވެރިވުމަށް ހަމަޖެހިފައިވެއެވެ.

މިއީ ދަރިވަރުންނާއި ޒުވާން ޕްރޮފެޝަނަލުންނަށް އިންޓަރެކްޓިވް ސެޝަންތަކާއި، މަޢުލޫމާތު ފެތުރުމާއި، ލައިވް ޑެމޮންސްޓްރޭޝަންތަކާއި އަދި ޝައުޤުވެރިކަން ހުރި ހަރަކާތްތަކުގެ ތެރެއިން އެކި ވައްތަރުގެ ވަޒީފާގެ މަގުތައް ދެނެގަތުމަށް ލިބޭ ފުރުޞަތެކެވެ. 

އެކި ދާއިރާތަކުން ފާހަގަކޮށްލެވޭ ބޭފުޅުންގެ މަޝްވަރާ ބައްދަލުވުންތައް ވެސް ކުރިއަށް ގެންދަވާނެއެވެ.

މި އެކްސްޕޯއަކީ މަތީ ތަޢުލީމުގެ ފުރުޞަތުތައް ދައްކުވައިދޭ ހަމައެކަނި ތަނެއް ނޫންކަމަށާއި، މީގެ އިތުރުން ވެސް ހުނަރު ތަރައްޤީކުރުމަށާއި ވަޒީފާގެ ދާއިރާގައި ކުރިއަށްދިއުމަށް އަމާޒުކޮށްފައިވާ މުހިންމު މަންޞައަކަށް މި އެކްސްޕޯ ވާނެކަމަށް މިނިސްޓްރީއިން ހާމަކޮށްފައިވެއެވެ.

ބައިވެރިންނަށް ފަންނީ އަދި ޓެކްނިކަލް ތަމްރީނު (ޓީވެޓް) ގެ ދާއިރާގެ މާހިރުންނާ ބައްދަލުކުރެއްވޭނެ އިންތިޒާމްތަކާއި، މަތީ ފަންތީގެ ފަތުރުވެރިކަމާއި، އިމާރާތްކުރުމާއި، ދެމެހެއްޓެނިވި ތަރައްޤީއާއި، އިންޖިނިއަރިންގ ފަދަ މުހިންމު ދާއިރާތަކުގެ ވަޒީފާގެ ފުރުޞަތުތަކާ ބެހޭ މަޢުލޫމާތު ދޭނެއެވެ. އޭގެ އިތުރުން އަމިއްލަ އިންސްޓިޓިއުޓްތަކާއި ޓީވެޓް ސެންޓަރުތަކުން ވެސް މައުލޫމާތާއި ހުރި ފުރުސަތުތައް އިތުރަށް ހާމަކޮށްދޭނެއެވެ.

އެގޮތުން އެކި ފަރާތްތަކުން ލިބެންހުރި ކޯސްތަކާއި، އިތުރަށް ކިޔެވުމުގެ ފުރުޞަތުތަކާއި، ވަޒީފާގެ ފުރުޞަތުތަކާ ބެހޭ މުހިއްމު މަޢުލޫމާތު ވެސް "ދާލަން" އެކްސްޕޯއިން ލިބިގެންދާނެއެވެ.