ދުނިޔޭގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ ކުޅެމުން އަންނަ ސަޢުދީ އަރަބިއްޔާގެ އަލް ނަސްރު، ސައުދީ ޕްރީ ލީގުގައި މި ސީޒަނުގައި ފުރަތަމަ ފަހަރަށް ބަލިވެއްޖެއެވެ.

އަލް ނަޞްރު ބަލިވެފައިވަނީ ރިޔާދުގައި އަލް ގަދްސީއާ ދެކޮޅަށް ކުޅުނު މެޗުން 1-2 ގެ ނަތީޖާއަކުންނެވެ. މި މޮޅާއެކު އަލް ގަދްސީއާ ވަނީ އެޓީމު މިހާތަނަށް ކުޅުނު 11 މެޗުން 22 ޕޮއިންޓާއެކު ތާވަލުގެ ފަސް ވަނައަށް ޖެހިލައިފައެވެ.

މެޗުން ބަލިވި ނަމަވެސް އަލް ނަޞްރު ވެސް އޮތީ ތާވަލުގެ ތިން ވަނައިގައި ހަމަ 11 މެޗުން 22 ޕޮއިންޓު ހޯދައިގެންނެވެ. އެޓީމަށް ކުރި ލިބިފައިވަނީ ފައިދާ ގޯލުގެ ތަފާތުންނެވެ. ލީގުގެ ދެވަނައިގައި އިއްތިހާދު 10 މެޗުން 27 ޕޮއިންޓާއެކު އޮތްއިރު 10 މެޗުން 28 ޕޮއިންޓް ހޯދައިގެން އަލް ޙިލާލު އޮތީ އެއްވަނައިގައެވެ.

އަލް ގަދްސިއާ ދެކޮޅަށް ކުޅުނު މެޗުގައި އަލް ނަޞްރަށް 32 ވަނަ މިނެޓުގައި ރޮނާލްޑޯ ވަނީ ލަނޑެއް ކާމިޔާބުކޮށްދީ ލީޑު ނަގައިދީފައެވެ. ނަމަވެސް އަލް ގަދްސިއާ ވަނީ ފަހަތުން އަރައި ދެ ލަނޑު ކާމިޔާބުކޮށް ނަތީޖާ އަނބުރާލައިފައެވެ.