މެންޗެސްޓަރ ސިޓީގެ މައްސަލަތަކަށް ފަހު އެ ކްލަބު ރެލިގޭޓް ކުރި ނަމަވެސް އެ ކްލަބުގައި މަޑުކުރާނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ސިޓީން ވަނީ ދާދި ފަހުން އޭނާއާ އެކު ހަދާފައިވާ އެއްބަސްވުމުގެ މުއްދަތަށް ދެ އަހަރު އިތުރުކޮށް 2027 ގެ ނިޔަލަށް ކްލަބުގައި މަޑުކުރާނެ ކަމަށް ބުނެފަ އެވެ.

ޕްރިމިއާ ލީގުގައި މި ހަފްތާގައި ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ގަޑިއޯލާ ބުނެފައި ވަނީ އޭނާ މީގެ ކުރިން ވެސް ބުނި ފަދައިން މިހާރު ބަލަމުންދާ މައްސަލަތަކަށް ފަހު އަދަބެއްގެ ގޮތުން ސިޓީ ޕްރިމިއާ ލީގުން ރެލިގޭޓް ކުރި ނަމަވެސް އޭނާ އެ ކްލަބުގައި މަޑުކުރާނެކަމަށެވެ.

އެއް ސީޒަނެއްގައި ގާޑިއޯލާ ވަނީ ޕްރިމިއާ ލީގާއި، އެފްއޭ ކަޕްގެ އިތުރުން ޔުއެފާ ޗެމްޕިއަންސް ލީގު ކާމިޔާބުކޮށްދީ، އެއް ސީޒަނެއްގައި ތިން މުބާރާތް ކާމިޔާބުކުރި އިނގިރޭސިވިލާތުގެ ދެވަނަ ޓީމަށް އެ ޓީމު ހަދައިފައެވެ. މީގެ އިތުރުން އެ ޓީމު ވަނީ ޕްރިމިއާ ލީގުގައި 100 ޕޮއިންޓް ހޯދި ފުރަތަމަ ޓީމަށް ވެސް ވެފައެވެ.