އާޖެންޓީނާއާ އެކު އެ ޓީމުގެ ތަރި ލިއޮނެލް މެސީ އިންޑިއާގެ ކެރެލާގައި ކުޅޭ މެޗަކަށް އަންނަ އަހަރު އަންނަން ހަމަޖެހިފައިވާ ކަމަށް ކެރެލާގެ ސްޓޭޓް ސްޕޯޓްސް މިނިސްޓްރީން އިއުލާނުކޮށްފިއެވެ.

މެޑްރިޑުގައި އާޖެންޓީނާގެ ފުޓްބޯޅަ ފެޑަރޭޝަންއާ އެކު ސްޓޭޓް މިނިސްޓަރު އަބްދުއްރަޙްމާން އާއި ކެރެލާގެ ޗީފް މިނިސްޓަރު ޕިޔަނާރީ ވިޖަޔަން މިދިޔަ ސެޕްޓެމްބަރު މަހު މަޝްވަރާ ބައްދަލުވުންތަކެއް ކުރިއަށް ގެންދިޔަ ކަމަށް މީޑިއާތަކުން ރިޕޯޓުކުރިއެވެ.

އަބްދުއްރަހުމާން ވިދާޅުވީ، ދުނިޔޭގެ މަޝްހޫރު ފުޓްބޯޅަ ކުޅުންތެރިޔާ، މެސީ ހިމެނޭހެން ކެރަލާގައި މެޗެއް ކުޅެން އާޖެންޓީނާ އިން އަންނައިރު، މި މެޗުގެ ހުރިހާ ކަމެއް ބަލަހައްޓާނީ ސްޓޭޓް ސަރުކާރުން ކަމަށެވެ. އަދި މި މެޗާ ގުޅޭ މުހިންމު ކަންތައްތަކެއް މަޝްވަރާ ކުރުމަށް ކުރިއަށް އޮތް ދޮޅު މަހެއްހާ ދުވަސްތެރޭ އާޖެންޓީނާ ފުޓްބޯޅަ ފެޑެރޭޝަނުން ކެރަލާ އަށް ޒިޔާރަތްކުރާ ގޮތަށް ހަމަޖެހިފައިވާ ކަމަށެވެ.

ފީފާ އިންޓަނޭޝަނަލް ބްރޭކެއްގައި އިންޑިއާ ގައުމީ ޓީމާ ދެކޮޅަށް އާޖެންޓީނާ އިން ކުޅޭ މި މެޗު ކޯޗިންގައި ކުޅުމުގެ ފުރުސަތު ބޮޑުކަމަށް އެ ޤައުމުގެ މީޑިއާތައް ބުނެއެވެ. އެކަމަކު، އަބްދުއްރަހުމާން ވިދާޅުވީ، ކުޅޭނެ ތާރީހަކާއި ސްޓޭޑިއަމެއް ކަނޑައަޅާނީ ދެން އޮންނަ ބައްދަލުވުމެއްގައި ކަމަށެވެ.

މެސީ ވަނީ 2011 ވަނަ އަހަރު އިންޑިއާގައި މެޗެއް ކުޅެފައެވެ. އެއީ، ކަލްކަތާގެ ސޯލްޓް ލޭކް ސްޓޭޑިއަމްގައި ވެނެޒުއޭލާއާ ދެކޮޅަށެވެ.