އިނގެރޭސި ކުޅަދާނަ ކެޕްޓަން ހެރީ ކޭން، ޖަރުމަން ލީގުގެ ރެކޯޑެއް ހަދައިފިއެވެ.

ކޭން ބަޔާން މިއުނިކްއަށް ހަދައިދިން ހެޓްރިކާ އެކު އޭނާވަނީ އެންމެ އަވަހަށް ބުންޑަސް ލީގާގައި 50 ގޯލު ހަމަކުރި ކުޅުންތެރިޔާގެ ރެކޯޑު ހަދައިފައެވެ. މި ރެކޯޑް އޭނާ ހަދާފައިވަނީ އޮއުސްބާގުއާ ދެކޮޅަށް މިއުނިކުން ކުޅުނު މެޗުގައެވެ.

ސާޅީސް ތިން މެޗުން އޭނާ ވަނީ 50 ގޯލަ ޖަހާފައެވެ. މީގެ ކުރިން އެ ރެކޯޑު އޮތީ 50 މެޗުން 50 ގޯލް ހަމަކުރި މެންޗެސްޓާރ ސިޓީއަށް ކުޅޭ ހާލަންޑް އަތުގައެވެ. އޭނާ މި ރެކޯޑު ހެދީ ބޮރޫޝިޔާ ޑޯޓްމުންޑްގައެވެ.

މެޗުގައި ރެކޯޑް ހެދި ކޭންގެ ތިން ލަނޑުގެ ތެރެއިން ފުރަތަމަ ދެ ލަނޑު ކާމިޔާބުކޮށްފައިވަނީ ލިބިނު ދެ ޕެނަލްޓީ ކާމިޔާބުކޮށްގެންނެވެ. ފަހު ދެ  ލަނޑު ޖެހީ މެޗުގެ އިތުރު ވަގުތުގައެވެ.

ބަޔާންއިން އިތުރު ވަގުތުގައި ލަނޑުޖެހީ އޮއުސްބާގްގެ ޝޮލްޓަރބެކް އަށް ދެވަނަ ރީނދޫ ކާޑާއެކު ރަތްކާޑް ދެއްކި ފަހުންނެވެ. އޭނާއަށް ރަތްކާޑު ދެއްކީ ވެސް އިތުރު ވަގުތުގައެވެ.

މި މޮޅާއެކު ބަޔާން އޮތީ މި ސީޒަނުގެ އެއްވެސް މެޗަކުން ބަލިނުވެ، އަށް ޕޮއިންޓުގެ ލީޑަކާއެކު ތާވަލުގެ އެއްވަނައިގައެވެ. އަދި 31 އަހަރުގެ ކޭން ވަނީ މި ސީޒަނުގައި މިހާތަނަށް ލީގުގައި 11 މެޗުން 14 ގޯލް ޖަހައިފައެވެ.