ޤާނޫނުލް އުގޫބާތަށް ރައީސް ގެންނަވަން ނިންމެވި އިސްލާހަކީ ދައުލަތްތެރޭ އޮތް ޒަމާންވީ ކޮރަޕްޝަންގެ މައްސަލަ ހައްލުކުރެވޭނެ އަދި އެނިޔަތާއި އަޒުމް ފެންނަ އިސްލާހެއް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙުސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ދަޢުލަތުގެ އިދާރާތަކުގެ ކޮރަޕްޝަން ނައްތާލުމަށް ޤާނޫނީގޮތުން ހުރި ގޮންޖެހުންތައް ނައްތާލުމަށް ޤާނޫނަށް އިސްލާހު ހުށައެޅުމަށް ނިންމަވާފައިވާކަމަށް ރައީސުލްޖުމްހޫރިއްޔާ ހާމަކުރެއްވުމާ ގުޅިގެންނެވެ

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވަނީ ނުޙައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދަޢުވާކުރުމުގައި ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލް އުޤޫބާތަށް އިސްލާހު ގެންނެވުމަށެވެ. މި އިސްލާހު ކުރިއަށް އޮތް ހަފްތާގައި، ސަރުކާރުގެ ފަރާތުން ރައްޔިތުންގެ މަޖިލީހަށް ހުށައެޅުއްވުމަށް އެމަނިކުފާނު ވަނީ ނިންމަވާފައެވެ

ވަޒީރު އިޙުސާން ވިދާޅުވީ މިހާރު އޮތް ޤާނޫނުލް ޢުޤޫބާތުގައި ކޮރަޕްޝަން ހުއްޓުވުމަށް ލިޔެފައިވާ މާއްދާތަކަކީ ކަންކުރުމުގެ ނިޔަތެއްނެތި ލިޔެފައި އޮތް މާއްދާތަކެއް ކަމަށެވެ.

ރައީސުލްޖުމްހޫރިއްޔާގެ އެ ނިންމެވުމުގެ މުހިއްމުކަން ފާހަގަކުރައްވަމުން އިޙުސާން ވިދާޅުވީ މިހާރު އޮތް ޤާނޫނުލް ޢުޤޫބާތުގައި މިމާއްދާ ލިޔެފަ އޮތީ، މިވާހަކަ ގަދަޔަށް ދައްކާފަ އެއްވެސް މީހެއްގެ މައްޗަށް ދައުވާ ނުކުރެވޭ ގޮތަށް ކަމަށެވެ. އަދި ދައުވާކުރި ނަމަވެސް ސާބިތުނުވާ ގޮތަށް ކަމަށެވެ.

ސަރުކާރުގެ ފަރާތުން އިސްލާހު ހުށައެޅުއްވުމަށް ނިންމާފައިވަނީ ޤާނޫނުލް ޢުޤޫބާތުގެ 515 ވަނަ މާއްދާއަށެވެ. މިއީ ނުޙައްޤު މުއްސަނދިކަން ހޯދައި ލިބިގަތުމުގެ ކުށްތައް ކަނޑައަޅާފައިވާ މާއްދާއެވެ.