ނިއު ރޭޑިއަންޓް ސްޕޯޓްސް ކްލަބުގެ އާ ޗެއާމަންގެ މަގާމަށް ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރ އަހުމަދު މުބީން ރޭ އިންތިޚާބުކޮށްފި އެވެ.

ދަރުބާރުގޭގައި ރޭ ބޭއްވި ނިއުގެ ބައްދަލުވުމުގައި ކްލަބުގެ ޗެއާމަންގެ މަގާމު މުބީނަށް ކަށަވަރުވީ އެ މަގާމަށް އެހެން ބޭފުޅަކު ކުރިމަތިލާފައި ނުވާތީ އެވެ. އެހެންވެ މުބީން އަށް ތާއީދު އޮތްތޯ ބެލީ މެންބަރުން އަތް ހިއްލައިގެން ދިން ވޯޓުންނެވެ.

ނިއުގެ އެއް ނައިބް ރައީސްގެ މަގާމަށް އިންތިޚާބުކޮށްފައި ވަނީ ވޭސްޓް މެނޭޖްމަންޓް ކުންފުނި (ވެމްކޯ) ގެ މެނޭޖިން ޑިރެކްޓަރު މުޖްތަބާ ޖަލީލެވެ. އަނެއް ނައިބް ރައީސް އަކީ ހެންވޭރު ހުޅަނގު ދާއިރާގެ މަޖިލިސް މެންބަރު އަލީ އިބްރާހިމް (ކައްޕި) އެވެ. ނިއުގެ ބޯޑަށް ވަނީ ދުވާފަރު ދާއިރާގެ މަޖިލިސް މެންބަރު މުހައްމަދު އަލީ ވެސް އިންތިޚާބުކޮށްފަ އެވެ. އަދި ނިއުގެ ބޯޑަށް ވަނީ ހައްޖު ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަކީލް ވެސް އިންތިޚާބުކޮށްފައެވެ.

ޗެއާމަންގެ މަގާމަށް އިންތިޚާބުވެވަޑައިގަތުމަށް ފަހު މުބީން ވިދާޅުވީ އޭނާގެ ފުރަތަމަ އަމާޒަކީ ކްލަބު ދަރަނިން ސަލާމަތް ކުރުން ކަމަށާ އަދި ނިއުއާ ހަވާލުވީ ކްލަބުގެ ހާލަތު ރަނގަޅަށް އެނގި ހުންނަވައިގެން ކަމަށެވެ. ނިއު ރޭޑިއަންޓް އަލުން ފުރަތަމަ ޑިވިޝަނަށް ގެނެސް ކްލަބުގައި ކުރިން އޮތް ދިރުން އަނބުރާ ގެނައުމަކީ ވެސް މުހިންމު އަމާޒެއް ކަމަށް މުބީން ވިދާޅުވި އެވެ.