އެމެރިކާގެ ކެލިފޯނިއާގައި  ބޭއްވި ހަ ވަނަ ކެރަމް ވޯލްޑް ކަޕުން މެޑަލް ހޯދި ރާއްޖޭގެ ގައުމީ އަންހެން އަދި ފިރިހެން ޓީމަށް ކޮމިޝަނަރ އޮފް ސްޕޯޓްސް މުޙައްމަދު ތޮލާލް މަރުޙަބާ ވިދާޅުވެއްޖެއެވެ.

އަށާރަ ގައުމަކުން ބައިވެރިވި މި މުބާރާތުގައި ރާއްޖޭގެ އަންހެން ޓީމާއި ފިރިހެން ޓީމު ވަނީ ލޯ މެޑަލް ހޯދައިފައެވެ. އަންހެން ޓީމު ތިންވަނަ ހޯދީ މުބާރާތް ބޭއްވި ގައުމު، އެމެރިކާ އަތުން 2-1 ގޭމުން މޮޅުވެގެންނެވެ. އަދި ފިރިހެން ޓީމު ތިންވަނަ ހޯދީ ސިންގަޕޫރުގެ މައްޗަށް 2-1 އިން ކުރި ހޯދުމަށްފަހުއެވެ.

ގައުމީ ކެރަމް ޓީމު ރާއްޖެ އައުމުން ވެލާނާ އިންޓަނޭޝަނަލް އެއަރޕޯޓުގައި މަރުޙަބާ ދެންނެވުމުގެ ރަސްމިއްޔާތެއް ބޭއްވިއެވެ. މި ރަސްމިއްޔާތުގައި ކޮމިޝަނަރ އޮފް ސްޕޯޓްސް މުޙައްމަދު ތޮލާލްގެ އިތުރުން ކުޅިވަރު ވުޒާރާގެ އިސްވެރިން ބައިވެރިވިއެވެ. އަދި މޯލްޑިވްސް އޮލިމްޕިކް ކޮމިޓީގެ ރައީސް ރައީސް މުޙައްމަދު އަބްދުއްސައްތާރު އާއި ޖެނެރަލް ސެކެޓްރީ ތަމޫހު އަހުމަދު ސައީދު ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.

ކެރަމް ވޯލްޑް ކަޕުން މެޑަލް ހޯދުމަކީ ދިވެހި ކުޅިވަރަށް ލިބުނު ވަރަށް ބޮޑު ކުރިއެރުމެއް ކަމަށް ކޮމިޝަނަރ އޮފް ސްޕޯޓްސް ވިދާޅުވިއެވެ. އަދި މި ކާމިޔާބީއަކީ ދިވެހި ކުޅުންތެރިންގެ ހުނަރާއި ހިތްވަރުގެ ނަތީޖާއެއްކަން ފާހަގަކުރެއްވިއެވެ.