ރަޝިއާއަށް ހަމަލާދިނުމަށް އެމެރިކާގެ ދުރު ރާސްތާ މިސައިލްތަކެއް، ޔޫކްރެއިނުން ބޭނުންކޮށްފައިވާ ކަމަށް ރަޝިއާއިން ބުނެފި އެވެ.

ރަޝިއާގެ ދިފާއީ ވުޒާރާއިން ބުނެފައިވާ ގޮތުން އިއްޔެ ޔޫކްރެއިނުން ރަޝިއާގެ ސަރަހައްދަށް ހަމަލާދީފައިވަނީ އެމެރިކާއިން ދިން އެޓެކްއެމްއެސް މިސައިލްތައް ބޭނުންކޮށްގެންނެވެ.

ޔޫކްރެއިނުން ބްރިއަންސްކް ސަރަހައްދުގައި ހުރި ތަނަކަށް ހަ ބެލިސްޓިކް މިސައިލް ފޮނުވާލައިފައިވާ ކަމަށް ޓެލެގްރާމްގައި ޝާއިޢުކުރި ބަޔާނެއްގައި މިނިސްޓްރީން ބުނެފައިވައިވެ އެވެ. އަދި އީ އެމެރިކާގައި އުފެއްދި އެޓެކްއެމްއެސް މިސައިލްކަން ކަށަވަރުވެފައިވާ ކަމަށް ބުނެފައިވެއެވެ.

މީގެ ތެރެއިން ފަސް މިސައިލް ވަނީ ވައިގެ ދިފާއީ ނިޒާމުން ވައްޓާލާފައި ކަމަށާއި، އަނެއް މިސައިލަށް ގެއްލުން ދީފައިވާ ކަމަށް މޮސްކޯއިން ބުނެފައިވެ އެވެ. އަދި މިސައިލްތަކުގެ ބައިތައް ވެއްޓުނީ ބްރިއަންސްކް ސަރަހައްދުގައި ހުރި އަސްކަރީ ތަނެއްގެ ޓެކްނިކަލް ސަރަހައްދަށް ކަމަށާއި، އޭގެ ސަބަބުން އަލިފާން ރޯވެފައިވީ ނަމަވެސް އަވަހަށް ނިއްވާލެވުނު ކަމަށް ބުނެފައިވެއެވެ. 

މި ހަމަލާއަކީ ޔޫކްރެއިން-ރަޝިއާ ހަނގުރާމައިގައި އާ ބަދަލެއް ގެނެސްދޭނެ ކަމެއް ކަމަށް ބެލެވެއެވެ. އެމެރިކާއިން ދިން ދުރުރާސްތާ މިސައިލްތައް ބޭނުންކުރުމުގެ ހުއްދަ ލިބުމާ އެކު، ޔޫކްރެއިނަށް ރަޝިއާގެ އެތެރޭގައި ހުރި އަސްކަރީ ތަންތަނަށް ހަމަލާދިނުމުގެ ފުރުސަތު ބޮޑުވެގެންދާނެ ކަމަށް ބެލެވެއެވެ.