ނިމިގެން ދިޔަ އެއް އަހަރު ދުވަސްތެރޭ ރައީސް ޑޮކްޓަރ މުހައްމަދު މުއިއްޒުގެ ޒައާމަތުގައި ސަރުކާރު ހިންގާފައި ވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިވުމާ އެކު، ހާމަކަން ބޮޑު ގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށް ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބުނެފިއެވެ.

ޕީއެންސީން ނެރުނު ނޫސް ބަޔާނެއްގައި ބުނީ ޚަރަދު ކުޑަކުރުމަށް ސަރުކާރުން އެޅި ފިޔަވަޅުތަކުގެ ސަބަބުން އަހަރުން އަހަރަށް ބޮޑުވަމުން އައި ޚަރަދުތައް ކޮންޓްރޯލް ކޮށްފައިވާ ކަމަށެވެ. އެގޮތުން ފާއިތުވި ތިން އަހަރު އެވަރެޖްކޮށް ކޮންމެ އަހަރަކު 15 އިންސައްތައިން ދައުލަތުގެ ޚަރަދުތައް އިތުރުވަމުންދިޔަ ނަމަވެސް، ފާއިތުވި އަހަރާ އަޅާބަލާއިރު މި އަހަރު ދައުލަތުގެ ޚަރަދުތައް އިތުރުވީ 2.5 އިންސައްތައިގައި ކަމަށެވެ. މީގެ އިތުރުން ބަޖެޓު ޑެފިސިޓް ކޮންޓްރޯލްކުރެވި، މި އަހަރު ޖުމްލަ ބަޖެޓުގެ ޑެފިސިޓް 378 މިލިއަން ރުފިޔާއަށް ކުޑަކުރެވި 3.6 އިންސައްތަ ދަށްކުރެވިފައިވާ ކަމަށް ވެސް ބަޔާނުގައިވެއެވެ.

"ނިމުނު ސަރުކާރުގައި ބޭރުގެ އެހީގައި ހިންގަން ފެށި މަޝްރޫޢުތަކުގެ ޚަރަދުތައް ޤަވާއިދާއި އެއްގޮތަށް ރެކޯޑްނުކޮށް މިއަހަރުގެ ޚަރަދުތަކުގެ ތެރެއަށް އެ ޚަރަދުތައް ހިމެނުމުން ކުރިމަތިވި މައްސަލަތައް ވެސް މި ސަރުކާރުން ދަނީ ހައްލު ކުރަމުންނެވެ. އަދި ދައުލަތުގެ ޚަރަދާ ގުޅޭ ތަފްސީލް ވެސް ހިއްސާނުކުރާކަމަށް ބުނާއިރު، އެއީވެސް ހަޤީގަތާއި ޚިލާފު ވާހަކަތަކެކެވެ." އިދިކޮޅު އެމްޑީޕީން ދައްކާ ވާހަކަތަކަށް ރައްދު ދެމުން ޕީއެންސީގެ ބަޔާނުގައި ބުނެފައިވެއެވެ.

ދައުލަތުގެ ޚަރަދާއި އާމްދަނީގެ ތަފްސީލް ފިނޭންސް މިނިސްޓްރީން ކޮންމެ ހަފުތާއަކު ހާމަކުރަމުންދާ ކަމަށް ވެސް ޕީއެންސީގެ ބަޔާނުގައި ބުނެފައިވެއެވެ.

މަޢޫލޫމާތު ހޯދުމާއި ލިބިގަތުމުގެ ޙައްގުގެ ދަށުން އެކި ކަންކަމުގައި ޖަބާބުދިނުމުގައި ސަރުކާރުން އިހުމާލުވެފައިވާކަމަށް އެމްޑީޕީން ބުނާއިރު، އެއީވެސް ހަޤީޤަތާއި ޚިލާފު ވާހަކަތަކެއްކަން ތަފާސް ހިސާބުތަކުން ފެންނަކަމަށް ބަޔާނުގައިވެއެވެ. އެގޮތުން ރައީސުލްޖުމްހޫރިއްޔާގެ އޮފީހަށް ހުށައެޅި އާރްޓީއައިގެ ތެރެއިން، ޤާނޫނުގައި ބަޔާންކުރާ މުއްދަތު ހަމަވި ހުރިހާ އާރްޓީއައިއަކަށް ވަނީ ޖަވާބުދީފައިކަމަށާއި އަދި ސަރުކާރުގެ ވުޒާރާތަކާއި ދަޢުލަތުގެ ކުންފުނިތަކުން ވެސް އަންނަނީ އާރްޓީއައިތަކަށް ޖަވާބު ދެމުންކަމަށް ބަޔާނުގައި ފާހަގަކޮށްފައިވެއެވެ.

"ފާއިތުވި ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބެއް ނުދެއެވެ. ދައުލަތުގެ ކުންފުނިތަކުން އާރްޓީއައި އަށް ޖަވާބު ދޭން ޖެހޭނެ ކަމަށް ދިވެހި ރާއްޖޭގެ ކޯޓުތަކުން ކަނޑައެޅުމުން ވެސް ޖަވާބު ނުދީ ހިފަހައްޓާފައިވެއެވެ. އެ ސިޔާސަތު ނިމުމަކަށް ގެންނެވީ ރައީސުލް ޖުމްހޫރިއްޔާ ޑޮކްޓަރ މުހައްމަދު މުއިއްޒެވެ." ވެރިކަންކުރާ ޕާޓީގެ ބަޔާނުގައި ބުނެފައިވެެއެވެ.

މީގެ އިތުރުން ސަރުކާރުގެ ސިޔާސީ މުވައްޒަފުންގެ ޢަދަދު ހޯދުމަށް ނޫސްތަކުން އެކި ވުޒާރާތަކަށް ފޮނުވި އާރްޓީއައިތަކަށް އެ ވުޒާރާތަކުން ޖަވާބުދީ، އެ ވުޒާރާތަކުގައި ތިބި ސިޔާސީ މުވައްޒަފުންގެ އަދަދާއި މުވައްޒަފުންގެ މުސާރަ އާއި އިނާޔަތްތަކަށް ދަޢުލަތުން ކުރާ ޚަރަދުތައް ވެސް ނޫސްތަކުން ރިޕޯޓްކޮށްފައިވާކަން ޕީއެންސީގެ ބަޔާނުގައި ފާހަގަކޮށްފައިވެއެވެ. އެގޮތުން މިދިޔަ އަހަރު 70 އަށްވުރެ ގިނަ ނޫސްވެރިންގެ ބައްދަލަވުން ބޭއްވިއިރު، 700 އަށްވުރެ ގިނަ ފަހަރު ވަޒީރުން އެކި މީޑިއާތަކަށް މަޢުލޫމާތު ދީފައިވާ ކަމަށް ވެސް ޕީއެންސީން ބުންޏެވެ. އަދި މި މުއްދަތުގައި އެއްވެސް މީޑިޔާއަކަށް ފިޔަވަޅު އެޅުމަށް ސަރުކާރުން އެއްވެސް ކަމެއް ކޮށްފައި ނުވާކަން ވެސް ފާހަގަކޮށްފައިވެއެވެ.

ކެބިނެޓްގެ ނިންމުންތައް އާއްމުންނަށް ފެންނާނެ ގޮތަށް އާއްމުކުރަން ފެށީ ވެސް މި ސަރުކާރުން ކަމަށް ބަޔާނުގައިވެއެވެ. އެގޮތުން މާޗު 24 އިން ފެށިގެން، އެކަމަށް ޚާއްސަ ވެބްސައިޓެއްގައި ކެބިނެޓުގެ ކޮންމެ ނިންމުމެއް އަދާހަމަކޮށް އަންނަނީ ޝާއިޢުކުރަމުން ކަމަށް ޕީއެންސީން ބުންޏެވެ.

"ދިވެހި ރައްޔިތުންނަށް ފެންނަންހުރި މިފަދަ ސާފު ޙަޤީޤަތްތައް އޮޅޭގޮތަށް، ދައުލަތުން ފައިސާ ދީގެން ހިންގާ ދައުލަތުގެ މުއައްސަސާއެއް ކަމަށްވާ އަދި ޒިންމާދާރު އިދިކޮޅު ސިޔާސީ ޕާޓީއެއްގެ މަގާމު އަދާކުރަންޖެހޭ އެމްޑީޕީން މައުލޫމާތު ފެތުރުމަކީ ބަލައިގަނެވޭނެ ކަމެއް ނޫނެވެ. އަދި ރައްޔިތުންނަށް ހަގީގަތް އޮޅޭ ގޮތަށް އެ ޕާޓީން މައުލޫމާތު ފެތުރުން ކުށްވެރި ކުރަމެވެ." ޕީއެންސީގެ ބަޔާން ނިންމާލަމުން ބުނެފައިވެއެވެ.