ރާއްޖޭގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ އާދަތައް ކުރިއެރުވުމަށް އަމާޒުކޮށްގެން ބީއެމްއެލުން ކުރިއަށް ގެންދިޔަ ވޭސްޓް މެނޭޖްމަންޓް ގްރާންޓް ޕްރޮޖެކްޓް ކާމިޔާބުކުރި ޖަމިއްޔާތައް އިއުލާނުކޮށްފިއެވެ.

މި ޕްރޮޖެކްޓް ކާމިޔާބު ކުރި ދެ ޖަމިއްޔާގެ ތެރެއިން އެއް ޖަމިއްޔާއަކީ ލިވް އެންޑް ލާރން އެންވަޔަރަންމަންޓަލް އެޑިޔުކޭޝަން މޯލްޑިވްސް އެވެ. މި ޖަމިއްޔާ އަށް ގްލާސް ކްރަޝާ ތިން މެޝިން ބޭންކުން ފޯރުކޮށްދިނުމަށް ހަމަޖެހިފައިވާއިރު، އާލާތްތައް ލިބޭ ރަށްތަކަކީ ކ. ގާފަރު، އއ. އުކުޅަސް އަދި އދ. ދިގުރަށެވެ.

މި ޕްރޮޖެކްޓް ކާމިޔާބުކުރި އަނެއް ޖަމިއްޔާއަކީ މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އެވެ. މި ޖަމިއްޔާއަށް ގްލާސް ކްރަޝަރ އެއް މެޝިން އަދި އެއް ބޭލަރ ފޯރުކޮށްދޭއިރު، މި އާލާތްތައް ލިބޭނީ ހުޅުމާލެއަށެވެ.

މި މަސައްކަތުން ކުނިގޮނޑުތަކަށް އުކާލެވޭ ކުނީގެ މިންވަރު މަދުކޮށް، ކުނި ނައްތާލުމުގެ ޚަރަދު ކުޑަކޮށް، އަދި ހަރުދަނާ ގޮތެއްގައި ރީސައިކަލްކުރުމުގެ މަސައްކަތް ކުރިއެރުވޭނެ ކަމަށާއި، މި ޕްރޮޖެކްޓަކީ ދެމެހެއްޓެނިވި މުޖުތަމަޢުތަކެއް ބިނާކުރުމަށާއި ތިމާވެށި ރައްކާތެރިކުރުމަށް ބޭންކުން ކުރަމުންދާ މަސައްކަތްތަކުގެ ތެރެއިން ހިންގުނު މަޝްރޫއެއް ކަމަށް ބީއެމްއެލުން ބުންޏެވެ.