ސަރުކާރަށް އެއް އަހަރު ފުރުން ފާހަގަކުރުމަށް ހޯމް ޓީމުން ގިނަ ހަރަކާތްތަކެއް ހިންގުމަށް ނިންމާފަވާއިރު ޑިޕާޓްމަންޓް އޮފް ޖުވެނައިލް ޖަސްޓިސް އިން އޯޕަންޑޭއެއް މާދަމާ ބޭއްވުމަށް ނިންމައިފިއެވެ.

ޑީޖޭޖޭއިން ބާއްވާ އޯޕަންޑޭ ނުވަތަ ފަހި ދުވަސް އޮންނާނީ ހ. ސަކީނާމަންޒިލްގައެވެ.

މިފަދަ އޯޕަންޑޭ އެއް އިންތިޒާމްކުުރުމުގެ މަގްސަދަކީ އާންމު ރައްޔިތުންނާއި ޑީޖޭޖޭއާ ގާތްގުޅުމެއް ބަދަހިކޮށް ޑީޖޭޖޭގެ މަސައްކަތްތައް ރައްޔިތުންނަށް އޮޅުންފިލުވައިދިނުން ކަމުގައި ވަނީ ބުނެފައެވެ.

ރައްޔިތުންނަށް ހުޅުވާލައިގެން ބާއްވާ މި އޯޕަންޑޭއަށް ޒިޔާރަތް ކުރުމަށް ހަމަޖެހިފައިވަނީ މާދަމާ ހެނދުނު 09:00 އިން 11:00ގެ ނިޔަލަށެވެ.

މި އޯޕަންޑޭގައި ޑީޖޭޖޭގެ މަސައްކަތްތަކާ ގުޅުން ހުރި ސުވާލުތަކަށް ޖަވާބު ދެއްވާނީ މިނިސްޓްރީ އޮފް ސްޓޭޓް ފޯރ ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަހުމަދު ސިއްދީގު އާއި ޖުވަނައިލް ޖަސްޓިސް ކޯޑިނޭޓަރ ޝަޒީނާ ސަޢީދު، ޑިރެކްޓަރ ހައްވާ ޒިމްނާގެ އިތުރުން ސީނިއަރ ލީގަލް އޮފިސަރ ފާތިމަތު ފަޒީލާ އަދި ޑިރެކްޓަރ ޢަލީ އައުޒަމްއެވެ.

މީގެ އިތުރުން އެންސީއައިޓީން ވެސް ވަނީ މާދަމާ އޯޕަންޑޭއެއް ބާއްވަން ނިންމައިފައެވެ. އެ އޮފީހުގެ މަސައްކަތްތަކާ ގުޅޭގޮތުން މައުލޫމާތު ދިނުމަށް ހަމަޖެހިފައި ވަނީ މާދަމާ ހެނދުނު 10:00 އިން މެންދުރު 14:00ގެ ނިޔަލަށް އެންސީއައިޓިގައެވެ. މިއީ ވެސް އާންމުންނަށް ހުޅުވާލައިގެން ކުރިއަށްގެންދާ އޯޕަންޑޭއެކެވެ.