ENGLISH
26 ނޮވެމްބަރު 2024
އަމިއްލަ ހޮސްޕިޓަލުތަކުން ހުށަހަޅާފައި ވަނީ ބޮޑެތި އަގުތަކެއް: އާސަންދަ
19 ނޮވެމްބަރު 2024
|
ރައްޔިތުންގެ މަޖިލީހުގެ އިޖުތިމާޢީ ކޮމިޓީގެ ބައްދަލުވުން
އެންމެ މަޤްބޫލު
އަމިއްލަ ބޮޑެތި ހޮސްޕިޓަލުތަކުން ހުށަހަޅާ އަގުތަކަކީ ފުދޭވަރަކަށް ބޮޑު އަގުތަކެއް ކަމަށް އާސަންދަ ކުންފުނީގެ ސީއީއޯ އާމިނަތު ޒީނިޔާ ވިދާޅުވެއްޖެއެވެ.
ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި ވާހަކަ ދައްކަވަމުން ޒީނިޔާ ވިދާޅުވީ، އާސަންދައިގެ ޚިދުމަތް ރައްޔިތުންނަށް ފޯރުކޮށްދިނުމަށްޓަކައި ރާއްޖޭގައި ޚިދުމަތްދޭ އަމިއްލަ ބޮޑެތި ހޮސްޕިޓަލުތަކާ މަޝްވަރާކޮށްފައިވާ ކަމަށެވެ. ނަމަވެސް އެ ހޮސްޕިޓަލުތަކުން ހުށަހަޅާ އަގުތަކަކީ ފުދޭވަރަކަށް ބޮޑު އަގުތަކެއް ކަމަށް ވިދާޅުވިއެވެ. އަދި ހޮސްޕިޓަލުތަކުން އަގު ހަދާފައި ހުންނަނީ ބަލިމީހާ ހޮސްޕިޓަލަށް ވަންނަ ހިސާބުން ފެށިގެން ދެވޭ ކޮންމެ ޚިދުމަތަކަށް ވަކިންކަން އޭނާ ފާހަގަކުރެއްވިއެވެ.
"ރާއްޖެއިން ބޭރަށް ބަލި މީހުން ފޮނުވައިގެން ކުރާ ހޭދައަށްވުރެ ވެސް ޚަރަދު ބޮޑުއެބަވޭ މިހެން. އެ އަގުތަކަށް ބަލާފައި އަޅުގަނޑުމެން ކޮމްޕެރިޒަންސްތަކެއް ހަދާފައި އަޅުގަނޑުމެން ނެގޯޝިއޭޓްކުރަން އެ އަގު ތިރިކުރުމަށް ވެސް. " - ސީއީއޯ އާމިނަތު ޒީނިޔާ
މީގެއިތުރުން، ކުރިން އާސަންދައިން ކަވަރުނުކުރާ ބައެއް ޚިދުމަތްތަކަށް ވެސް މިހާރު އާސަންދަ ލިބޭނެ ކަމަށް ޒީނިޔާ ވިދާޅުވިއެވެ. މީގެ ތެރޭގައި އައިވީއެފް އާއި ތެލަސީމިއާގެ ޚިދުމަތްތައް ހިމެނެއެވެ. އަދި މިހާރު މަސައްކަތް ކުރަމުންދަނީ ހޮސްޕިޓަލުތަކުން ދޭ ޚިދުމަތްތައް ޕެކޭޖްކުރުމުގެ މަސައްކަތްކަމަށް ވެސް އޭނާ ވިދާޅުވިއެވެ.
މި ބައްދަލުވުމުގައި ނޭޝަނަލް ސޯޝަލް ޕްރޮޓެކްޝަން އޭޖެންސީގެ ސީއީއޯ ހީނާ ވަލީދު ވިދާޅުވީ، އާސަންދަ ނިޒާމަކީ ވޭތުވެދިޔަ ހުރިހާ ދައުރެއްގައި ވެސް ސިޔާސީ ބޭނުމަށް ބޭނުންކުރަމުން ދިޔަ އެއްޗެއް ކަމަށެވެ. އަދި ރާއްޖޭގައި ބޭހުގެ އަގުތައް ހުރީ ބޭރުގެ ޤައުމުތަކާ އަޅާބަލާއިރު 15 ގުނަ މަތީގައިކަން ހީނާ ފާހަގަކުރެއްވިއެވެ.
