ރާއްޖެއިން ބައިއެނުއަލް ޓްރާންސްޕޭރަންސީ ރިޕޯޓު (ބީޓީއާރު) އދ. ގެ މޫސުމަށް އަންނަ ބަދަލުތަކާ ބެހޭ އޮނިގަނޑު (ޔޫއެންއެފްސީސީސީ) އަށް ހުށަހަޅައިފިއެވެ.

މިއީ ޕެރިސް އެއްބަސްވުމުގެ ދަށުން ހަރުދަނާކުރެވިފައިވާ ހާމަކަން ބޮޑު އޮނިގަނޑުގެ ދަށުން ދިވެހިރާއްޖެއިން އަދާކުރަންޖެހޭ ޒިންމާއެކެވެ.

ދިވެހިރާއްޖެއަކީ މި ރިޕޯޓު ހުށަހެޅި ތިންވަނަ ކުދި ޖަޒީރާ ޤައުމެވެ. މި ރިޕޯޓުގައި ދިވެހި ރާއްޖޭގެ ގްރީންހައުސް ގޭސް ބޭރުކުރާ މިންވަރާއި، މޫސުމަށް އަންނަ ބަދަލުތަކުގެ އަސަރު ކުޑަކުރުމަށާއި އެ ބަދަލުތަކަށް ހޭނުމަށް ކުރެވޭ މަސައްކަތްތަކުގެ ތަފްސީލީ މަޢުލޫމާތު ހިމެނެއެވެ. މީގެ އިތުރުން، ޤައުމީ ފެންވަރުގައި ކަނޑައަޅާފައިވާ އަމާޒުތައް (އެންޑީސީ) ހާސިލުކުރުމަށް ކުރެވޭ މަސައްކަތްތަކުގެ ކުރިއެރުމާއި، މޫސުމަށް އަންނަ ބަދަލުތަކާ ގުޅޭ ޙަރަކާތްތައް ހިންގުމަށް ބޭނުންވާ އެހީއާއި ލިބިފައިވާ އެހީގެ މަޢުލޫމާތު ވެސް މި ރިޕޯޓުގައި ހިމަނާފައިވެއެވެ.

މި ރިޕޯޓު ހުށަހެޅުމާ ގުޅިގެން، ދިވެހި ރާއްޖެއަށް ވަނީ ބީޓީއާރު ޗެމްޕިއަން ސެޓްފިކެޓް ލިބިފައެވެ. މިއީ މޫސުމަށް އަންނަ ބަދަލުތަކާ ގުޅޭ ގޮތުން ބައިނަލްއަޤްވާމީ ފެންވަރުގައި އަޅަންޖެހޭ ފިޔަވަޅުތައް އެޅުމަށާއި، އެކަމާ ގުޅޭ މަޢުލޫމާތު ހާމަކުރުމަށް ދިވެހި ރާއްޖެއިން ދޭ އަހައްމިއްޔަތުކަން ފާހަގަކޮށް ދެވުނު ޝަރަފެކެވެ.

މި ރިޕޯޓު ހުށަހެޅުމަކީ ދިވެހި ރާއްޖެއިން މޫސުމަށް އަންނަ ބަދަލުތަކާ ގުޅޭ ގޮތުން ކުރަމުންދާ މަސައްކަތްތަކުގެ މުހިންމު ސަފްހާއެއް ކަމުގައި ސަރުކާރުން ބުނެއެވެ. އަދި މި ރިޕޯޓުން ދިވެހި ރާއްޖެއަކީ މޫސުމަށް އަންނަ ބަދަލުތަކާ ގުޅޭ ގޮތުން އަޅަންޖެހޭ ފިޔަވަޅުތައް އެޅުމުގައި އިސްނަގައިގެން މަސައްކަތްކުރާ ޤައުމެއްކަން ދައްކުވައިދޭ ކަމަށް ވެސް ބުނެއެވެ.

މި ރިޕޯޓު ތައްޔާރުކޮށްފައި ވަނީ މޫސުމަށް އަންނަ ބަދަލުތަކާބެހޭ ޑިޕާޓްމަންޓުގެ އިސްނެގުމުގެ ދަށުން، ސަރުކާރުގެ އެކި މިނިސްޓްރީތަކާއި، އަމިއްލަ ވިޔަފާރިތަކާއި، އަމިއްލަ ޖަމްޢިއްޔާތަކާއި އަދި ބައިނަލްއަޤްވާމީ ބައިވެރިންނާ މަޝްވަރާކޮށްގެންނެވެ. މި ހުރިހާ ފަރާތްތަކުގެ އެހީތެރިކަމާއެކު، 2024 ވަނަ އަހަރުގެ ޑިސެމްބަރު 31 ގެ ސުންގަޑިއަށްވުރެ ކުރިން މި ރިޕޯޓު ރާއްޖެ އިން ވަނީ ހުށަހަޅައިފައެވެ.

މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާގެ ވަޒީރު ޠާރިޤް އިބްރާހީމް ވިދާޅުވީ، ފުރަތަމަ ބީޓީއާރު ހުށަހެޅުމަކީ މޫސުމަށް އަންނަ ބަދަލުތަކާ ގުޅޭގޮތުން ކުރަމުންދާ މަސައްކަތުގައި ވަރަށް މުހިންމު މަރުހަލާއެއް ކަމަށެވެ. އަދި މިއީ މޫސުމަށް އަންނަ ބަދަލުތަކާ ކުރިމަތިލުމުގައި ހާމަކަން ބޮޑު އަދި ޒިންމާދާރު ގޮތެއްގައި މަސައްކަތްކުރުމަށް އެ ވުޒާރާއިން ދޭ އަހައްމިއްޔަތުކަން ދައްކުވައިދޭ ކަމެއް ކަމަށް ވެސް ވިދާޅުވެފައިވެއެވެ. މީގެ އިތުރުން މި ކާމިޔާބީ ހޯދުމުގައި އެހީތެރިވެދެއްވި އެންމެހާ ފަރާތްތަކަށް ވަޒީރު ވަނީ ޝުކުރު އަދާކުރައްވައިފައެވެ.