ރާއްޖޭގެ އެކި ކަންކޮޅުތަކުގައި ދައުލަތުގެ ޚާއްޞަ ސަމާލުކަމާއި ރައްކާތެރިކަން ބޭނުންވާ ޢާއިލާތައް ދެނެގަތުމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ފަށާފައިވާ "ހާލު ކިހިނެއް" ޕްރޮގްރާމްގެ ދަށުން 8،000 އަށް ވުރެ ގިނަ މީހުންގެ ހާލު ބަލައިފި އެވެ.

ރާއްޖޭގެ ހުރިހާ ހިސާބެއްގައި ވެސް ކުރިއަށް ގެންދާ މި ޕްރޮގްރާމުގައި މިހާތަނަށް ވަނީ 8،027 ގޭބީސީއަށް ޒިޔާރަތްކޮށް ހާލު ބަލައިފައެވެ. 

މާލެ ސަރަހައްދާއި އަތޮޅުތަކުގެ ރަށްތަކުގެ ތެރެއިން ފެމިލީ އެންޑް ޗިލްޑްރެން ސަރވިސް ސެންޓަރުތައް ހުރި ރަށްރަށުގެ ގޭގެއަށް ޒިޔާރަތް ހާލު ބެލުމުގެ ޕްރޮގްރާމް ފަށާފައި ވަނީ މި އަހަރުގެ މެއި 30 ވަނަ ދުވަހު އެވެ. މި ޕްރޮގްރާމުގެ ދަށުން ރާއްޖޭގެ މީހުން ދިރިއުޅޭ ހުރިހާ ރަށެއްގެ ހުރިހާ ގޭބީސީއަކަށް ޒިޔާރަތް ކުރުމަށް ވަނީ ހަމަޖެހިފައެވެ.

ހާލު ބެލުން ޕްރޮގްރާމުން ފާހަގަވި، އެންމެ ގިނަ ބައެއްގެ ކަންބޮޑުވުމަކީ އެކަށީގެންވާ އަމިއްލަ ބޯހިޔާވަހިކަމެއް ނެތުން ކަމަށް އާއިލީ ތަރައްގީއާ ބެހޭ ވުޒާރާއިން ވަނީ ބުނެފައެވެ. މި ޕްރޮގްރާމުގެ ދަށުން ކުރި ޒިޔާރަތްތަކުގައި، ޢާއިލާތަކުން ހުށަހެޅި ކަންބޮޑުވުންތައް ހައްލުކޮށްދިނުމަށް ސަރުކާރުގެ އިދާރާތަކާއި ގުޅިގެން ކުރި މަސައްކަތުން މިހާތަނަށް ވަނީ 407 މައްސަލަ ހައްލުކޮށްދީފައެވެ.

މާލީ ފުދުންތެރިކަން ދަށްވުމުގެ ސަބަބުން ޒަރޫރީ ބޭނުންތައް ފުއްދުމުގައި ދަތިވާ 13 ޢާއިލާއެއް ދެނެގަނެވި އެ ފަރާތްތަކަށް މަހުން މަހަށް ފޯރުކޮށްދޭ ޒަރޫރީ ސާމާނު ހިމެނޭ "ކެއާ ޕެކޭޖްތައް" ފޯރުކޮށްދޭން ފަށާފައިވާ ކަމަށް ވެސް އާއިލީ ތަރައްގީއާ ބެހޭ ވުޒާރާއިން ބުނެއެވެ.