ރާއްޖޭގައި ބޭހުގެ އަގުތައް ހުރީ ރައްޔިތުންގެ އަތް ނުފޯރާ ފަށުގައި ނޫން ކަމަށާއި، ސަރަހައްދީ ޤައުމުތަކާ އަޅާބަލާއިރު ރާއްޖޭގައި ބޭސް ވިއްކަމުން ދަނީ 15 ގުނަ ބޮޑުކޮށް ކަމަށް އެންސްޕާގެ ސީއީއޯ ހީނާ ވަލީދު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިޖުތިމާޢީ ކޮމިޓީގެ ބައްދަލުވުމުގައި ވާހަކަ ދައްކަވަމުން ހީނާ ވިދާޅުވީ 300 އިންސައްތަ އާއި 400 އިންސައްތައިގެ ފައިދާ ލާފައި ރާއްޖޭގައި ބޭސް ވިއްކަމުންދާކަން ފާހަގަކުރެވިފައިވާ ކަމަށެވެ.

ސަރުކާރުން ބޭހުގެ އަގު ހެޔޮކުރުމަށް ގެނައި ބަދަލަށް ބައެއް ފާމަސީތަކުން ދެކޮޅުހަދަމުންދާކަން ވެސް ހީނާ ފާހަގަކުރެއްވިއެވެ.

"ސަރުކާރުން ބޭސް އަގުހެޔޮކުރުމަށް ބޭހުގެ ލިސްޓަށް ގެނައި ބަދަލު ގިނަ ފާމަސީތަކުން ބަލައިގަނެ، ޢަމަލުކުރަމުންދާއިރު، އަދިވެސް ދެތިން ފާމަސީއަކުން މި ބަދަލަށް އިއުތިރާޒުކުރަމުންދޭ. އެހެންނަމަވެސް، އާސަންދަ މެދުވެރިކޮށް އަގުހެޔޮ ބޭސްތައް އެސްޓީއޯގެ ހުރިހާ ފާމަސީއަކުން ވެސް މިހާރު ލިބެން ހުންނާނެ،" ސަރުކާރުގެ ތަރުޖަމާނުގެ މަގާމު ވެސް އަދާކުރައްވަމުން ގެންދަވާ ހީނާ ވިދާޅުވިއެވެ.

ބޭސް ލިސްޓުގެ ދަށުން އަގުހެޔޮކޮށް 10 ބޭހެއް މިހާރު ރާއްޖެ އެތެރެކޮށް ދައުރުކުރަން ފަށާފައިވާކަމަށް އޭނާ ވިދާޅުވިއެވެ.

ރާއްޖޭގައި ޢާއްމުކޮށް ބޭނުންކުރާ ބޭސްތަކާއި ދުނިޔޭގެ ސިއްޙަތު ޖަމްޢިއްޔާ އިން ރާއްޖެއަށް ކަނޑައަޅާފައިވާ ބޭހުގެ ޚާއްޞަ ލިސްޓެއްގައި ހިމެނޭ ބޭސްތައް ބަލްކް ޕްރޮކިއުމަންޓް އުސޫލުން ގެނައުމުގެ މަސައްކަތް ސަރުކާރުން ފަށާފައިވާ ކަމަށް ހީނާ ވިދާޅުވި އެވެ. އަދި މި މަސައްކަތް ކުރިއަށްދަނީ ޔޫއެންޑީޕީއާ ގުޅިގެން ކަމަށް ވެސް ވިދާޅުވިއެވެ.