އެންމެ ރަނގަޅު ސިއްހީ ޚިދުމަތްތައް ފޯރުކޮށްދޭ ދެ ޤައުމުކަމަށްވާ ޔޫއޭއީ އާއި ތައިލެންޑުން ދިވެހިންނަށް ހިލޭ ބޭސްފަރުވާގެ ޙިދުމަތް ލިބޭނެ ސީދާ ތާރީޚު ވަރަށް އަވަހަށް އިއުލާނު ކުރައްވާނެ ކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި މެންބަރަކު މިއަދު ކުރެއްވި ސުވާލަކަށް ޖަވާބު ދެއްވަމުން ހީނާ ވިދާޅުވީ، ރައީސް ޑރ. މުޙައްމަދު މުޢިއްޒުގެ ވަޢުދާ އެއްގޮތަށް ޔޫއޭއީ އާއި ތައިލެންޑުން އާސަންދައިގެ ޚިދުމަތް ފޯރުކޮށްދޭނެ ކަމަށެވެ. މި ދެ ޤައުމުގެ ހޮސްޕިޓަލްތަކާ އެކު މަޝްވަރާކޮށް، ކުރިއަށް ދެވޭނެ ގޮތެއް ހޯދާފައިވާ ކަމަށާއި، އެކަމާ ގުޅޭ އިތުރު ތަފްޞީލާއި ތާރީޚެއް ވަރަށް އަވަހަށް ހާމަކުރައްވާނެ ކަމަށް އޭނާ ވިދާޅުވިއެވެ.

ތައިލެންޑާއި ޔޫއޭއީ އަށް އާސަންދަ ފުޅާކުރުމަށް ރައީސް ޑރ. މުހައްމަދު މުއިއްޒު ނިންމަވައި، އެކަން މިދިޔަ ޖެނުއަރީ މަހު ވަނީ އިއުލާން ކުރައްވައިފައެވެ.

"ޔޫއޭއީ އާއި ތައިލެންޑުން އާސަންދައިގެ ހިދުމަތް ފޯރުކޮށްދޭނަން. އިރާދަކުރެއްވިއްޔާ ރައީސުލްޖުމްހޫރިއްޔާ އެ ވައުދު ފުއްދަވާނެ،" ރައީސް އޮފީހުގެ ކުރީގެ ތަރުޖަމާނު ހީނާ ވިދާޅުވިއެވެ.

މި އަހަރުގެ ޖެނުއަރީ މަހު ރައީސް މުއިއްޒު ވިދާޅުވެފައި ވަނީ އާސަންދައަކީ "ހަމައެކަނި ވަކި ދިމާލެއްގައި" އޮންނަ ވަކި ގައުމެއްގައި ހުންނަ މެޑިކަލް ފެސިލިޓީތަކަށް އެކަނި ގޮސްގެން ލިބޭ ޚިދުމަތަކަށް ވާން އެ މަނިކުފާނު ބޭނުންފުޅު ނުވާ ކަމަށެވެ. އެހެންކަމުން، ފެންވަރު ރަނގަޅު ގައުމުތަކަށް އާސަންދައިގެ ހިދުމަތް ފުޅާކުރައްވަން މަސައްކަތްފުޅު ކުރައްވާކަމަށް ވެސް ރައީސް ވިދާޅުވިއެވެ.

"އެ ތަނަށް ދާއިރުގައި އެ ތަނުގެ އެކޮމޮޑޭޝަން އެކްސްޕެންސަސް އޭގައި ހިމެނޭ ގޮތަށް އިރާދަކުރެއްވިއްޔާ އަޅުގަނޑުމެންގެ އާސަންދަ ފުޅާކުރާނަން. އޭރުން އަޅުގަނޑުމެންގެ ދިވެހި ރައްޔިތުން، މި ގައުމުގެ ހެލްތު ފެސިލިޓީ ތަރައްގީ ވަންދެން ދާނ،ީ މިހާރު އެދާ ތަންތަނަށް ވުރެ މާ ފެންވަރު ރަނގަޅު، ދުބާއީ ކަހަލަ އަދި ބެންކޮކްގައި ހުންނަ ކަހަލަ ފެންވަރު ރަނގަޅު ހޮސްޕިޓަލްތަކަށް، އެކޮމޮޑޭޝަން އެކްސްޕެންސެސް ލިބިގެން، އާސަންދަ އިން ކަވަރު ވެގެން،" ރައީސް މުއިއްޒު މިދިޔަ ޖެނުއަރީ މަހު ޗައިނާ އަށް ކުރެއްވި ދަތުރުފުޅަށް ފަހު ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ވާހަކަފުޅު ދައްކަވަމުން ވިދާޅުވިއެވެ.