އިންވެސްޓިގޭޝަން އޮފިސަރުންނަށް ރައްޔިތުން ކުރާ އިތުބާރު ކުރިއަށް އޮތްތަނުގައި މިހާރަށް ވުރެ ބޮޑަށް އިތުރުވެގެންދާނެ ކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

ފާއިތުވި އެއް އަހަރުގެ ތެރޭގައި މޯލްޑިވްސް ޕޮލިސް ސަރވިސް އިން ހާސިލްކުރި މުހިންމު ކަންތައްތަކުގެ މައުލޫމާތު ހިއްސާކުރައްވާ ސީޕީ ވިދާޅުވީ މޯލްޑިވްސް ޕޮލިސް ސަރވިސްއަށް ހުށަހެޅޭ މައްސަލަތަކުގެ ވާނުވާ ނޭނެގޭ މައްސަލައަކީ ރައްޔިތުންގެ ހުރި ވަރަށް ބޮޑު ކަންބޮޑުވުމެއް ކަމަށެވެ. އެހެންވެ އަމާޒަކީ މައްސަލަ ބައްލަވާ އައިއޯއިން މަދުވެގެން 14 ދުވަހުގެ ތެރޭގައި މައްސަލަ ހުށަހެޅި ފަރާތަށް ގުޅާ މައްސަލަ ކުރިއަށްދާ ގޮތުގެ މައުލޫމާތު ފޯރުކޮށްދޭ މިންވަރަށް މަސައްކަތްތައް ބައްޓަންކުރުން ކަމަށެވެ.

ސީޕީ ވިދާޅުވީ މިހާރު ވެސް ބައެއް އަތޮޅުތަކުގައި އެގޮތަށް މަސައްކަތްތައް ކުރިއަށްދާ ކަމަށާއި އައިއޯ އިން މިހާރުވެސް ހިއްސާކުރަންޖެހޭ މައުލުމާތުތައް މައްސަލަ ހުށަހަޅާ ފަރާތާ ފުރަތަމަ 24 ގަޑިއިރުގެ ތެރޭގައި ހިއްސާކުރަމުންދާ ކަމަށާއި ނަމަވެސް އޭގެ ފަހުން އެ މައްސަލައިގައި ވާނުވާ ނޭނގޭ މައްސަލައަކީ ތަކުރާރުވާ ކަމެއް ކަމަށެވެ.

"އައިއޯ އިންނަކީ ވަރަށް މަދު ބައެއް. ކޮންމެ އައިއޯ އަކަށް ޖެހޭ މައްސަލައިގެ އަދަދަށް ބަލާއިރު ކޮންމެ އައިއޯއަކަށް ވަރަށް ބައިވަރު މައްސަލަތަކެއް އެބަހުރި. ސަބަބަކީ ޤާނޫނަށް އެންމެ ފަހުން ގެނައި ބަދަލުގަ އައިއޯއިންނަކީ ވަކިކަހަލަ ތަމްރީނުތަކެއް ހާސިލްކޮށްގެން ތިބި ބައެއްގެ ގޮތުގައި ނިންމުމުން ކޮލިފިކޭޝަން ނެތް ވަރަށް ގިނަ އައިއޯއިން އެ މަސައްކަތެއް ނުކުރާނެ. ރަނގަޅު އައިއޯއިން ތަމްރީނު ކުރުމުގެ މަސައްކަތް ވެސް އެބަކުރަން," ސީޕީ ޝުޖާޢު ވިދާޅުވިއެވެ.

ސީޕީ ވިދާޅުވީ އެކަންކަމަށް ހައްލު ހޯދުމަށްޓަކައި ބަދަލުތަކެއް ގެންނަވަން ނިންމަވާފައިވާ ކަމަށާއި މިކަމުގެ ސަބަބުން ފުލުހުންގެ ޚިދުމަތަށް ރައްޔިތުން ކުރާ އިތުބާރު އަނެއްކާވެސް އިތުރުވެގެންދާނެ ކަމަށެވެ.

ފުލުހުންނާއި ރައްޔިތުންނާ އޮންނަ ގުޅުން ވަރުގަދަ ކުރުމަށްޓަކައި ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވައި ސީޕީ ވިދާޅުވީ ފުލުހުންނަކީ 24 ގަޑިއިރު ރައްޔިތުންގެ ޚިދުމަތުގައި މަސައްކަތް ކުރަންޖެހޭ ބައެއްކަން ފުލުހުންގެ މަސައްކަތުން ދައްކައިދިނުމަކީ މުހިންމު ކަމެއް ކަމަށެވެ.

ފުލުހުންނަކީ އެންމެ އަވަހަށް ރައްޔިތުންނާ ގާތުން ޚިދުމަތް ދޭނެ ބައެއްގެ ގޮތުގައި ހެދުމަށްޓަކައި ކުރި މަސައްކަތްތައް ފާހަގަކުރައްވާ ސީޕީ ވަނީ އަތޮޅު ކައުންސިލްތަކުންނާއި އަދި އާންމު ގިނަ ރައްޔިތުންނާ ފާއިތުވި އެއް އަހަރުގެ ތެރޭގައި ބައްދަލުވި ކަމަށް ވިދާޅުވެފައެވެ.

އެކިއެކި ބައްދަލުވުންތަކުގައި ރައްޔިތުން ފުލުހުންނާ ދޭތެރޭ ދެކޭގޮތް އޮޅުން ފިލުވައިވާފައިވާނެ ކަމަށާއި އެއިން ކޮންމެ ބައްދަލުވުމެއްގައި ވެސް އެނގި ހާމަވެގެންދިޔައީ ރައްޔިތުން ފުލުހުންނަށް ކުރާ އިތުބާރު އިންތިހާއަށް އިތުވެގެން ގޮސްފައިވާ މިންވަރު ކަމަށް ސީޕީ ވިދާޅުވިއެވެ.

"ގިނަ ރަށްރަށުގައި ކުށްކުރާ ރެކޯޑްސް ވަރަށް މަދު. އެފަދަ ރަށްރަށުގަ އަޅުގަނޑުމެންގެ ފުލުހުން މަސައްކަތެއް ނެތްކަމުގައި ވަނީނަމަ ޕޮލިސް ޕޯސްޓުތަކުގަ ތިބެ ޑިއުޓީ ނިންމާލުމުގެ ސަގާފަތެއް މިއޮތީ. އެހެންނަމަވެސް އެކަން ބަދަލުކޮށް އަޅުގަނޑުމެންނަށް ރިޕޯޓެއް ލިބުނަސް ނުވަތަ ނުލިބުނަސް އެ ޑިއުޓީއެއްގައި ވީހާވެސް ގިނަ ވަގުތު ރައްޔިތުންނާ އެއްކޮށް ނުވަތަ ރައްޔިތުން ކަންބޮޑުވާ ތަންތަނުގައި ފުލުހުން ފެންނާނެ ގޮތަކަށް ފުލުހުންގެ މަސައްކަތަށް މިގެނައި ބަދަލުތަކުގެ ވާހަކަ ކައުންސިލްތަކުން ފާހަގަކުރޭ،" ސީޕީ ޝުޖާޢު ވިދާޅުވިއެވެ.