ENGLISH
31 އޯގަސްޓު 2025
ޗެލްސީން މޮޅަކުން ކްލަބް ވޯލްޑް ކަޕް ފަށައިފި
17 ޖޫން 2025
|
މިހާރު ކުރިއަށްދާ ފީފާ ކްލަބް ވޯލްޑް ކަޕުގައި ރޭ އެލްއޭ އެފްސީއާ ދެކޮޅަށް ކުޅުނު މެޗުން ހަނި ގޮތަކަށް އެ ޓީމު މޮޅުވެއްޖެ އެވެ.
އެޓަލަންޓާގެ މޭސިޑީޒް-ބެންޒް ސްޓޭޑިއަމްގައި ރޭ ކުޅުނު މެޗުން ޗެލްސީ މޮޅުވެފައި ވަނީ 0-2 ގެ ނަތީޖާއަކުންނެވެ. މެޗުގައި ޗެލްސީން ޖެހި ފުރަތަމަ ލަނޑު ކާމިޔާބުކޮށްދީފައި ވަނީ، ނިކޮލަސް ޖެކްސަން ދިން ޕާހެއް ހިފައިގެން އެލްއޭގެ ޕެނަލްޓީ އޭރިއާ ތެރެއަށް ވަދެ، ކައިރިއަށް އައި ޑިފެންޑަރު ކައިރިން ނައްޓާލުމަށްފަހު ކައިރި ދަނޑިއާ ދިމާލުން ގޯލު ތެރެއަށް ފޮނުވާލައިގެން، އެ ޓީމުގެ ޕޯޗުގަލް ފޯވާޑު، ޕެޑްރޯ ނެޓޯ އެވެ. ޗެލްސީން މި ލަނޑު ކާމުޔާބުކުރީ މެޗުގެ 34 ވަނަ މިނެޓުގައެވެ.
އެ ޓީމުގެ ދެވަނަ ލަނޑު، މެޗުގެ 70 ވަނަ މިނެޓުގައި ކާމިޔާބުކޮށްދިނީ އެ ޓީމުގެ އާޖެންޓީނާ މިޑްފީލްޑަރު، އެންޒޯ ފެނާންޑޭޒް އެވެ. މި ލަނޑަކީ، އެލްއޭގެ ޕެނަލްޓީ އޭރިއާގެ ކަނާތު ފަޅިން އިނގިރޭސި ފޯވާޑު ލިއަމް ޑިލަޕް ނަގައިދިން ހުރަހެއް ކޮންޓްރޯލު ކުރުމަށްފަހު، ގޯލުގެ ކަނާތުފަޅީ މަތީ ކަނަށް ފޮނުވާލައިގެން ކާމިޔާބުކުރި ލަނޑެކެވެ. މި ދެ ލަނޑުވެސް މަތަކުރަން ޓޮޓްނަމް ހޮޓްސްޕާ އަދި ފްރާންސް ޤައުމީ ޓީމުގެ ކުރީގެ ގޯލްކީޕަރު، ހޫގޯ ލޮރިސްއަށް މާ އެދެވޭ ވަރުގެ މަސައްކަތެއް ކުރެވިފައެއް ނުވެއެވެ.
މެޗުގެ ދެވަނަ ހާފަށް ޗެލްސީގެ ކުރީގެ ފޯވާޑު، އޮލިވިއަރ ޖިރޫޑް އެރުވި ނަމަވެސް އޭނާގެ ފަރާތުންވެސް އެލްއޭ އެފްސީގެ ސަޕޯޓަރުން އުއްމީދުކުރި ވަރުގެ މޮޅު ކުޅުމެއް ދެއްކިފައެއް ނުވެއެވެ.
މި ދެ ޓީމު ހިމެނޭ ގްރޫޕް ޑީ ގައި ކުޅުނު އަނެއް މެޗުގައި، ބްރެޒިލްގެ ފްލެމެންގޯ ވަނީ އޮސްޓްރޭލިއާގެ އެސްޕަރެންސް 0-2 ގެ ނަތީޖާއަކުން ބަލިކޮށްފައެވެ. އެހެންކަމުން ޗެލްސީ އަދި ފްލެމެންގޯ އޮތީ ހުރިހާ ގޮތަކުންވެސް އެއްވަރުވެފައެވެ.
މުބާރާތުގައި ކުރިއަށްހުރި މެޗުތަކަށް ބަލާއިރު، ރާއްޖެ ގަޑިން މިރޭ 9:00 ގައި ބްރެޒިލްގެ ފްލުމިނީސް ނުކުންނާނީ ޖަރުމަނުގެ ބޮރޫޝިއާ ޑޯޓްމަންޑާ ދެކޮޅަށެވެ. އަދި ފަތިހު 6:00 ގައި މެކްސިކޯގެ މޮންޓެރޭ ނުކުންނާނީ އިޓަލީގެ އެންމެ ކާމިޔާބު އެއް ޓީމު، އިންޓަރ މިލާންއާ ދެކޮޅަށެވެ.