މަސައްކަތްތެރިންގެ މަސައްކަތް އެއްތާކުން ފެނި ރަށުގެ މަސައްކަތްތެރިކަމާއި، ސަގާފަތް ދައްކާލުމާއި، ރަށުގެ ނަން ދިރުވާ އާލާކުރުމަށް މާޅޮސްމަޑުލު އުތުރުބުރީ އިނގުރައިދޫ ކައުންސިލުން މަސައްކަތްތެރިންގެ މަޢުރަޒެއް ބޭއްވުމަށް ނިންމައިފިއެވެ.

އިނގުރައިދޫ އަކީ ތަފާތު މަސައްކަތްތެރިން ގިނަ، މުޅިރާއްޖެއިން ވެސް ވަޑާމުގެ ރޮނގުން މަޝްހޫރު ރަށެކެވެ.

އިންގުރައިދޫ ކައުންސިލުން ހާމަކޮށްފައިވާ ގޮތުގައި މި މަޢުރަޒުގެ މައިގަނޑު މަޤްޞަދަކީ ރަށުގެ ނަން ދިރުވާ އާލާކޮށް އާމްދަނީ ލިބޭނެ ފަހި ފުރުޞަތުތައް ރައްޔިތުންނަށް ތަނަވަސް ކޮށްދިނުމެވެ. މިއީ ފަތުރުވެރިންނަށް ޚާއްޞަކޮށްގެން ބޭއްވޭ މަޢުރަޒެކެވެ. މި މަޢުރަޒު ބޭއްވުމަށް ހަމަޖެހިފައިވަނީ 14 ޑިސެންބަރު ވާ ހޮނިހިރު ދުވަހުއެވެ.

މި މަޢުރަޒުގައި އެހާރާއި މިހާރުގެ މަސައްކަތްތެރިކަމަށް ބޭނުންކުރި ސާމާނާއި، ދިވެހިންގެ ސަގާފީ ރަހަތަކާއި، ދިވެހި އުފެއްދުންތައް ހިމެނޭ ކާބޯތަކެތި ތައްޔާރުކޮށް ބެހެއްޓުމުގެ ފުރުޞަތު ވަނީ ހުޅުވާލައިފައެވެ. އަދި މި މަޢުރަޒުގައި ބަހައްޓާ ތަކެތި ވިއްކައިގެން ލިބޭ ފައިސާ ޙަވާލުކުރުމަށް ހަމަޖެހިފައިވަނީ އެ ތަކެތީގެ ވެރިފަރާތަށެވެ.

މަޢުރަޒުގައި ތަކެތި ބައިވެރިކުރުމަށް ބޭނުންވާ ފަރާތްތަކުން 1 ޑިސެންބަރު 2024 ވާ އާދީއްތަ ދުވަހުގެ މެންދުރު ފަހު 14:00 ގެ ކުރިން ކައުންސިލް އިދާރާގައި ނަންނޯޓް ކުރުމަށް ވަނީ އެދިފައެވެ.