ނޯވޯ ނޯޑިސްކް ކުންފުނިން އުފައްދާ ބަރުދަން ލުއިކުރާ "ވެގޯވީ" ބޭސް ޗައިނާގައި ވިއްކަން ފަށައިފިއެވެ.\

މިއީ ޖޫން މަހު ޗައިނާގެ ސިއްޙީ އިދާރާތަކުން ހުއްދަ ދިނުމާ ގުޅިގެން އެ ޤައުމުގައި ވިއްކަން ފެށި ބޭހެކެވެ.

މި ބޭސް ވިއްކަން ފެށުމާއެކު، އެލައި ލިލީގެ ބަރުދަން ލުއިކުރާ ބޭހާ ވާދަވެރިކަން އިތުރުވާނެ ކަމަށް ބެލެވެއެވެ. އެލައި ލިލީގެ ބޭހަށް ވެސް މީގެ މަސްތަކެއް ކުރިން ހުއްދަ ލިބިފައިވީ ނަމަވެސް، އަދި އެ ބޭސް ދުނިޔޭގެ ދެވަނައަށް އެންމެ ބޮޑު ބޭސް މާކެޓްގައި ވިއްކަން ފަށައިފައެއް ނުވެއެވެ.

ޗައިނާގެ އާބާދީއަކީ 1.4 ބިލިއަން މީހުންނެވެ. އޭގެ ތެރެއިން 180 މިލިއަނަށްވުރެ ގިނަ މީހުންނަކީ ބަރުދަން އިތުރު މީހުންނެވެ.

ޗައިނާގެ ވިޔަފާރި ޚަބަރު ވެބްސައިޓް "ޔީކައި" އިން ބުނާ ގޮތުގައި ވެގޯވީގެ ހަތަރު އިންޖެކްޝަނެއްގެ އަގަކީ 1،400 ޔުއާން (194 އެމެރިކާ ޑޮލަރު) އެވެ. މިއީ އެމެރިކާގައި މި ބޭސް ވިއްކާ އަގާ އަޅާބަލާއިރު ވަރަށް ކުޑަ އަގެކެވެ. ނަމަވެސް ޗައިނާގައި މި ބޭސް ޤައުމީ ސިއްޙީ އިންޝުއަރަންސްގެ ދަށުން ނުހިމެނޭތީ، ބޭނުންކުރާ މީހުން އަމިއްލައަށް އަގު ދައްކަންޖެހޭނެއެވެ.

ޗައިނާގެ އެޕް "ވީޗެޓް" ގައި ނޯވޯ ނޯޑިސްކްއިން ބުނެފައިވަނީ މި ބޭހަކީ "ޗައިނާގެ ބަރުދަން އިތުރު މީހުންނަށް ރައްކާތެރި އަދި ނަތީޖާ ނެރެވޭ ބަރުދަން ލުއިކުރުމުގެ ގޮތެއް" ކަމަށެވެ.

ވެގޯވީގެ މައިގަނޑު ބާވަތަކީ ސެމަގްލުޓައިޑް ކިޔާ ބޭހެކެވެ. މި ބޭހުގެ ސަބަބުން ލޭގައި ހުންނަ ހަކުރުގެ މިންވަރު ކޮންޓްރޯލް ކުރެވި، ކެއުމުގެ ޝައުޤު ކުޑަވެ، އަދި އަވަހަށް ބަނޑުފުރޭ ކަމަށް އިހުސާސް ކުރެވެއެވެ. ނަމަވެސް ބައެއް މީހުންނަށް މި ބޭހުގެ ސަބަބުން  ހޮޑުލުމާއި މޭ ނުބައިކުރުން ފަދަ އަސަރުތައް ކުރެއެވެ. އަދި ދިރާސާތަކުން ދައްކާ ގޮތުގައި ބޭސް ބޭނުންކުރުން ހުއްޓާލުމުން ގިނަ މީހުންގެ ބަރުދަން އަލުން އިތުރުވެއެވެ.

ވެގޯވީ އެމެރިކާގައި ވިއްކަން ފެށީ 2021 ވަނަ އަހަރުއެވެ. އެ ޤައުމުގައި މިހާރު މި ބޭހުގެ އެއް މަހުގެ ސަޕްލައިއެއްގެ އަގަކީ 1،349 ޑޮލަރެވެ.