މި އަހަރުގެ މަސްވެރިންގެ ދުވަސް ފާހަގަ ކުރުމުގެ ގޮތުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ކުރިއަށްގެންދާ ޚަރަކާތްތަކުގެ ތެރޭގައި ފަރުމަސްވެރިކަމުގެ މުބާރާތެއް ބޭއްވުމަށް ހަމަޖައްސައިފިއެވެ.

މިމުބާރާތް ކުރިއަށް ގެންދިއުމަށް ހަމަޖެހިފައިވަނީ 6 ޑިސެމްބަރު 2024 ވާ ހުކުރު ދުވަހުގެ މެންދުރުފަހު 15:00 އިން ފެށިގެން އެ ދުވަހުގެ ރޭގަނޑު 21:00 އަށެވެ. މުބާރާތް ފެށުން އަދި ނިމުން ފާހަގަކުރަން ހަމަޖެހިފައިވަނީ ހުޅުމާލެ ފެރީ ޓާމިނަލް ސަރަހައްދުގައެވެ.

މި މުބާރާތުގެ މަޤުޞަދަކީ ވާދަވެރި މާހައުލެއްގައި މަސްވެރިކަން ކުރުމާއި ދިވެހި ރާއްޖޭގެ މަސްވެރިންގެ ދުވަސް ކުލަގަދަކޮށް ފާހަގަކުރުން ކަމުގައި ވުޒާރާއިން ވަނީ ބުނެފައެވެ. 

މި މުބާރާތަކީ ސަރުކާރުގެ މުވައްސަސާތަކާއި ކުންފުނިތަކުގެ ދަށުން ރަޖިސްޓްރީ ކޮށްފައިވާ ނުވަތަ އަމިއްލަ ގޮތުން ރަޖިސްޓަރކޮށްފައިވާ ޖަމްޢިއްޔާ, ޖަމާޢަތްތަކަށް ހުޅުވާލައިގެން ބާއްވާ މުބާރާތެކެވެ. މިނިސްޓްރީން ހާމަކޮށްފައިވާ ގޮތުގައި މި މުބާރާތުގައި ބައިވެރިވުމުގެ ފުރުސަތު ދޭނީ ފޯމު ފުރަތަމަ ހުށަހަޅާ ފަރާތްތަކުގެ ތެރެއިން ޝަރުތު ހަމަވާ 20 ޓީމަށެވެ.

މި މުބާރާތުގައި ބައިވެރިވާ ކޮންމެ ޓީމެއްގައި މެނޭޖަރެއް ހިމެނޭހެން 13 މެންބަރުންނަށްވުރެ ގިނަވެގެން ނުވާނެ ކަމަށާއި މި 13  މެންބަރުންގެ ތެރޭގައި ފަޅުވެރިން ނުހިމެނޭނެ ކަމަަށް ވުޒާރާގެ އިޢުލާންގައި ވަނީ ބުނެފައެވެ. ދޯނީގެ ފަޅުވެރިން ފިޔަވައި ޓީމުގެ ހުރިހާ މެންބަރުންނަށް ވެސް މަސް ބޭނުމުގައި އަމަލީ ގޮތުން ބައިވެރި ވެވޭނެއެވެ.

މީގެ އިތުރުން ޓީމުތަކަށް ކިޔާ ނަންތަކަކީ އޮފީސް، ކުންފުނި، ޖަމިއްޔާ ޖަމާޢަތް ނުވަތަ ބްރޭންޑެއްގެ ނަން ރަމްޒުކޮށްދޭ ނަމަކަށް ހެދިދާނެ ކަމަށާއި އެއްވެސް ކަހަލަ ސްޕޮންސަރެއްގެ ނަން ރަމްޒުކޮށްދޭ ނަމެއް ޓީމަކަށް ނުކިޔޭނެ ކަމަށް ވުޒާރާއިން ވަނީ ބުނެފައެވެ.