ސިވިލް ސަރވިސް މުވައްޒަފުންނަށް މުހިންމު އިލްތިމާސްތަކެއް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ކުރައްވައިފިއެވެ.

ހެލްތު މިނިސްޓްރީގެ ސިވިލް ސަރވިސް މުވައްޒަފުންގެ 52 ހަފުތާގެ މަސައްކަތުގެ އަގުވަޒަންކުރުމުގެ ގޮތުން އޮރެންޖް ހިޔާގައި ބޭއްވި ޙަފްލާގައި ވާހަކަފުޅު ދައްކަވަމުން، ފަސްޓް ލޭޑީ ވަނީ ސަރުކާރުގެ ސިޔާސަތުތައް ތަންފީޒުކުރުމުގައި ސިވިލް ސަރވިސް މުވައްޒަފުން އެއްބައިވަންތަކަމާއެކު މަސައްކަތްކުރުމުގެ މުހިންމުކަން ފާހަގަކުރައްވައިފައެވެ. އަދި އާންމު ޞިއްޙަތުގެ ދުޅަހެޔޮކަމަށްޓަކައި، ވޭޕް ކުރުން ފަދަ ނުރައްކާތެރި އާދަތަކުގެ ގެއްލުންތައް ރައްޔިތުންނަށް އަންގައިދިނުމަށް ޞިއްޙީ ދާއިރާގެ މުވައްޒަފުންނަށް ގޮވާލެއްވިއެވެ.

މެޑަމް ސާޖިދާ އިތުރަށް ވިދާޅުވީ، ޞިއްޙީ ދާއިރާގެ މުވައްޒަފުންނަކީ އިޚްލާޞްތެރިކަމާއެކު މަސައްކަތްކުރައްވާ ބައެއް ކަމަށެވެ. އަދި ސިވިލް ސަރވިސްގެ މުވައްޒަފުންނާއި ޕޮލިސީ ލެވެލްގައި މަސައްކަތްކުރައްވާ ފަރާތްތައް ގުޅިގެން މަސައްކަތްކުރުމުގެ މުހިންމުކަން ވެސް އެކަމަނާ ފާހަގަކުރެއްވިއެވެ.

މި ރަސްމިއްޔާތުގައި، ފަސްޓް ލޭޑީ ވަނީ ހެލްތުގެ ސިވިލް ސަރވިސް މުވައްޒަފުންނަށް ޝުކުރުގެ ބެޖު ޙަވާލުކޮށްދެއްވައިފައެވެ.