ލިލީމަގުގައި ހުންނަ މުލިއާގޭ ވެހިކަލް ގަރާޖު، ޒުވާނުންނަށް ޚާއްޞަ "ތަރޑް ސްޕޭސް" އަކަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މިއީ އިއްޔެ ބޭއްވި ވަޒީރުންގެ މަޖިލީހުގެ ބައްދަލުވުމުގައި، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އިން ހުށަހެޅުއްވި ކަރުދާހަކާ ގުޅިގެން ނިންމެވި ނިންމެވުމެކެވެ.

މި މަޝްރޫޢުގެ މައިގަނޑު މަޤްޞަދަކީ ޒުވާނުން ބާރުވެރިކުރުވައި، ހުނަރުވެރިކުރުވައި، އަދި މުޖުތަމަޢުގެ އެކި ފަރާތްތަކާއެކު އިޖުތިމާޢީ ގުޅުން ބަދަހިކުރުމެވެ. މި ތަނުގައި ހިންގުމަށް ރޭވިފައިވާ ޙަރަކާތްތަކުގެ ތެރޭގައި ބޫޓް ކޭމްޕްތައް، ސްކިލް އެކްސްޗޭންޖް ޕްރޮގްރާމްތައް، ވަރޗުއަލް ރިއަލިޓީ ތަމްރީނުތައް، އަދި އެހެނިހެން އިޖުތިމާޢީ ޙަރަކާތްތައް ހިމެނެއެވެ.

މި ތަނަކީ ގިނަ ސްކޫލްތަކެއް ހުންނަ، ޓްރެފިކް ބޮޑު ސަރަޙައްދަކަށް ވާތީ، ރަނގަޅު ޓްރެފިކް މެނޭޖްމަންޓް ޕްލޭނަކާއެކު މަޝްރޫޢު ކުރިއަށް ގެންދިއުމަށް ވެސް ރައީސުލްޖުމްހޫރިއްޔާ ވަނީ އަންގަވައިފައެވެ. އަދި މި ތަނުގައި ރާއްޖެއަށް ޚާއްޞަ ކާބޯތަކެތި ވިއްކުމަށާއި، ކުދި އަދި މެދު ފަންތީގެ ވިޔަފާރިތަކަށް ފުރުޞަތު ދިނުމަށް ވެސް ވަނީ ރޭވިފައެވެ.

މި މަޝްރޫޢަކީ ޒުވާނުންގެ އީޖާދީ ވިސްނުން ތަރައްޤީކޮށް، އެ މީހުންގެ ހުނަރުތައް އިތުރަށް ކުރިއެރުވުމަށް މަގުފަހިކޮށްދޭނެ ކަމެއްގެ ގޮތުގައި ސަރުކާރުން ދެކެއެވެ.