ކުށްކުރާ ކުޑަކުދިން އިސްލާހުކޮށް މުޖުތަމައުއަށް އަނބުރާ ގެނައުމަށް ސަރުކާރުން ގާއިމުކުރަން ނިންމާފައިވާ "ހޯޕް އައިލެންޑް" ގެ މަސައްކަތް މިއަހަރު ނިމުމުގެ ކުރިން ފަށަން މަސައްކަތް ކުރައްވަމުން ދާކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު، އަލީ އިހުސާން ވިދާޅުވެއްޖެއެވެ.

ވަޒީރު އިހުސާން މިފަދައިން ވިދާޅުވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާއި ގުޅިގެން ސަންގު ޓީވީ އަށް ދެއްވި އިންޓަވިއުއެއްގައެވެ. 

ހޯޕް އައިލެންޑަކީ ކުށުގެ މައްސަލަތަކަށް ވަރަށް ބޮޑު ހައްލެއް ގެންނާނެ ޕްރޮޖެކްޓެއް ކަމަށާއި، މި ކަމަށްޓަކައި ދ.ވާނީ ހަމަޖައްސައި، ޑިޒައިންގެ މަސައްކަތް ނިންމާފައިވާކަމަށް ވެސް ވަޒީރު ވިދާޅުވިއެވެ. 

"الله އިރާދަފުޅާއިއެކު ރައީސްގެ މިދައުރުގެ ތެރޭގައި އަޅުގަނޑުމެންނަށް މި ދިވެހިން އެދޭ ވަރުގަދަ ހުވަފެނެއް މިއީ. ދިވެހިންގެ ވަރަށް ބައިވަރު މީހުންގެ އުންމީދު ތަކެއް. "ހޯޕް" ގުޅިފައި އޮތް ޕްރޮޖެކްޓެއް މިއީ. އެހެންވީމަ އެ ޑެލިވާ ކުރާނަން އަޅުގަނޑުމެން އިނގޭތޯ،" ވަޒީރު އިހުސާން ވިދާޅުވިއެވެ.

އެކި ކުށްތަކަށް އަރައިގަންނަ ކުދިން ދައުލަތުގެ ބެލުމުގެދަށަށް ގެނެސް، އެކުދިން ރިހިބިލިޓޭޓް ކުރުމަށް ޚާއްސަ ފެސިލިޓީއެއް ވަކި ރަށެއްގައި ހެދުމަށް ނިންމާފައިވާކަން ވަޒީރު އިހުސާން ހާމަކުރެއްވީ މިއަހަރުގެ އޭޕްރީލް މަހުގެ 6 ވަނަ ދުވަހުގައެވެ. އަދި ދިގު މުއްދަތަށް ދައުލަތު ބެލުމުގެ ދަށަށް ކުދިން ނެގޭނީ، ގާނޫނުގެ ދަށުން، ކޯޓު ހުކުމެއްގެ ތެރެއިން ކަމަށް ވެސް ވިދާޅުވިއެވެ.

ހޯޕް އައިލެންޑުގެ ގޮތުގައި ދ. ވާނީ ހަމަޖައްސާފައިވާއިރު، އެއްފަހަރާ 400 ކުދިން މިތަނުގައި ބައިތިއްބައިގެން ރިހެބިލިޓޭޓް ކުރެވޭނެކަމަށާއި، ކޮންމެ ދުވަހެއްގެ ފަތިސް ނަމާދުން ފެށިގެން، ދީނުގައި މަޖުބޫރުކުރާ ހުރިހާ ކަމެއް އެ ކުދިން ލައްވައި ކުރުވައި، ރަސްމީ ތައުލީމާއި ކަސްރަތު ކުރުން އަދި އެކި ހުނަރުތައް ދަސްކޮށްދިނުމުގެ ޕްރޮގްރާމްތައް ހިންގުމަށް ނިންމާފައިވާ ކަމަށްވެސް ވިދާޅުވެފައިވެއެވެ.

މީގެ އިތުރުން މިތަނުގައި ދިރިއުޅޭ ކުދިން 18 އަހަރު ވަންދެން އެތަނުގައިއުޅޭނެ ކަމަށާއި އެއަށްފަހު ދިވެހި ފުލުހުން ނުވަތަ ދިވެހި ސަފައިންގެ ޚިދުމަތުންކުރެ ތަނެއްގައި ވަކި މުއްދަތެއް ވަންދެން އެކުދިން ޚިދުމަތް ކުރަންޖެހޭ ގޮތަށް ސަރުކާރުން ނިންމާފައިވާކަމަށް ވަޒީރު އިހުސާން ވިދާޅުވިއެވެ.