ދުންފަތާ ރައްޔިތުން ދުރު ކުރުމަށް ކުރާ މަސައްކަތާ މެދު ގިނަ އަދަދެއްގެ ރައްޔިތުން ނުރުހުން ފާޅުކުރިނަމަވެސް އެކަން ކުރަނީ ރައްޔިތުންނަށް ހެޔޮ އެދޭތީ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.

ސަރުކާރަށް އަހަރެއް ފުރުމުގެ މުނާސަބަތުގައި ސޯޝަލް ސެންޓަރުގައި ރޭ ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ ދުންފަތަކީ ސިއްހަތަށް ވަރަށް ނުރައްކާ އެއްޗަކަށްވާތީ ކިތަންމެ އުނދަގޫ ވިޔަސް އެކަމާ ރައްޔިތުން ދުރަށް ދިޔުމަކީ މިސަރުކާރުން ބޭނުންވާ ގޮތް ކަމަށެވެ.

ދުންފަތުގެ އިސްތިއުމާލު ކުރުމުން ސަބަބުން ޖެހޭ ބަލިތަކާއި ލިބޭ ގެއްލުންތައް ޑޮކްޓަރުން މެދުވެރިކޮށް ރައްޔިތުންނަށް ކިޔައިދޭން ޖެހޭކަން ފާހަގަ ކުރައްވަމުން، ރައީސް މުއިއްޒު ވިދާޅުވީ ދުންފަތުގެ ސަބަބުން ޖެހޭ ބަލިތަކަށް މުޅި ހަޔާތުގައި ތަހަންމަލު ކުރަން ޖެހޭ ކަމަށެވެ.

ރައީސް މުއިއްޒު ވިދާޅުވީ ދުންފަތާ ގުޅިގެން ނިންމި ނިންމުންތަކަކީ ރައްޔިތުން ދެކެ ލޯބިވާތީ އަދި ރައްޔިތުންނަށް ހެޔޮ ގޮތް އެދޭތީ ނިންމި ނިންމެވުންތަކެއް ކަމަށާއި އެކަން ރައްޔިތުން ބަލައިގަތުމަކީ އެމަނިކުފާނުގެ ވަރަށް ބޮޑު އެދުމެއް ކަމަށެވެ.

މި ސަރުކާރުން ވަނީ ސިނގިރޭޓާއި ބިޑިން ނަގާ އިމްޕޯޓް ޑިއުޓީ 3ރ. އިން 8ރ. އަށް މަތިކުރަން ގާނޫނަށް ބަދަލު ގެނެސްފައެވެ. 

ސަރުކާރުން އަންދާޒާކުރާ ގޮތުގައި ގާނޫނަށް ގެނައި ބަދަލާއެކު އަންނަ އަހަރު ދައުލަތަށް އާމްދަނީގެ ގޮތުގައި އިތުރު 1.1 ބިލިއަން ރުފިޔާ ލިބޭނެ ކަމަށެވެ.

އޭގެއިތުރުން ރައީސް މުއިއްޒު ވިދާޅުވީ ރާއްޖެއިން ވޭޕް މަނާ ކުރަން ނިންމީ ވަރަށް ނުރައްކާތެރި ހިސާބަކަށް މުޖުތަމައުގައި އެ މައްސަލަ ގޮސްފައި އޮތުމުން ކަމަށާއި ޒުވާނުންގެ އިތުރުން ތުއްތު ކުދިންގެ މެދުގައި ވެސް އެކަން އާންމުވުގެ ބިރު އޮތް ކަމަށެވެ.

މަސްތުވާތަކެތި އަޅާފައިވާ ވޭޕްތައް ގްރޭޑް ތިނެއް އަދި ހަތަރެއްގައި އުޅޭ ކުދިންގެ ދަބަހުން ފެނިފައި ވާތީ، މަރުހަލާ ތަކަކަށް ބަހާލައިގެން އެކަން ކުރުމަށް ލަފާ ލިބުމުން ވެސް، އަވަސް ނިންމުމަކާ އެކު އެކަން މަނާ ކުރަން ނިންމެވީ ކަމަށް ރައީސް ވިދާޅުވި އެވެ.

ރާއްޖެއަށް ވޭޕް އެތެރެކުރުން ނޮވެމްބަރު 15 އިން ފެށިގެން މަނާކޮށްފައިވާއިރު، ވޭޕް ވިއްކުމާއި ބޭނުން ކުރުން ޑިސެމްބަރު 15 އިން ފެށިގެން މަނާ ކުރުމަށް ވަނީ ނިންމާފަ އެވެ.