ދެމެހެއްޓެނިވި ނިޒާމަކަށް އާސަންދަ ބަދަލުކުރުމުން އަންނަ އަހަރު 500 މިލިއަން ރުފިޔާ ސަލާމަތްކުރެވޭނެ ކަމަށް، ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ އަށް ހާޒިރުވެވަޑައިގެން ވާހަކަ ދައްކަވަމުން ޒަމީރު ވިދާޅުވީ، ބަލްކް ޕްރޮކިއުމަންޓާއި އާސަންދަ އަށް ގެންނަން ނިންމާފައިހުރި ބަދަލުތަކާ އެކު ވެސް އާންމުންނަށް ދޭ ހިދުމަތްތަކަށް އެއްވެސް ބަދަލެއް ނާންނާނެ ކަމަށެވެ. އަދި ލީކޭޖް ރަނގަޅުކޮށްގެން 500 މިލިއަން ރުފިޔާ ސަލާމަތް ކުރެވޭނެ ކަމަށް ލަފާކުރެވޭ ކަމަށް ވެސް ވިދާޅުވިއެވެ.

ސަރުކާރުން އާސަންދައަށް ގެނައި ބަދަލުތަކާ އެކު އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް ކުޑަ ކުރެވޭނެ ކަމަށް އަންނަ އަހަރަށް ލަފާކޮށް ހުށަހެޅި ބަޖެޓުގައި އަންދާޒާކޮށްފައިވެއެވެ.