މިއަދު ފުނަދޫ އެއާޕޯޓުގެ ފަޔާ ޓްރަކަށް ދިމާވި މައްސަލަ ހައްލުކޮށް އެއާޕޯޓުގެ ހިދުމަތްތައް އަލުން ފަށާފައިވާކަމަށް އެ އެއާޕޯޓު އޮޕަރޭޓުކުރާ ރީޖަނަލް އެއާޕޯޓްސް ކޮމްޕެނީ (އާރްއޭސީއެލް)އިން ބުނެފިއެވެ. 

މިއަދު ފަޔާ ޓްރަކަށް ދިމާވި މައްސަލައާ ގުޅިގެން ވަގުތީ ގޮތުން އެއާޕޯޓުގެ ހިދުމަތް މެދުކަނޑައިލަންޖެހުމުން ފުނަދޫއަށް ގައުމީ އެއާލައިން މޯލްޑިވިއަންއިން މިއަދު ކުރަން އޮތް ދަތުރު ނ.މާފަރަށް ބަދަލުކޮށްފައިވެއެވެ. 

އާރްސީއެލްއިން މިއަދު ބުނެފައިވަނީ އައު މެނޭޖުމެންޓު ކުންފުނީގެ ހިންގުމާ ހަވާލުވިއިރުވެސް އެ ކުންފުނިން ބަލަހައްޓަމުން އައި ހުރިހާ އެއާޕޯޓެއްގައި ހުރި ވެހިކަލްތަކަކީ ބާވެ ދުވަސްވެފައި ހުރި ތަކެތި ކަމަށެވެ. އަދި އެއާޕޯޓުތަކަށް ޒަމާނީ އައު ވެހިކަލް ހޯދުމުގެ މަސައްކަތް މިހާރު ކުރަމުންދާ ކަމަށެވެ. 

މިދިޔަ އަހަރުގެ އޮކްޓޯބަރު މަހުގައިވެސް ފުނަދޫ އެއާޕޯޓުގެ ފަޔާ ޓްރަކް ހަލާކުވެގެން ހިދުމަތްތައް މެދެކަނޑައިލާ މޯލްޑިވިއަންގެ ދަތުރުތަކެއް ކެންސަލް ކުރަންޖެހުނެވެ. 

އާރްސީއެލްއިންވަނީ މިފަދައިން ހިދުމަތް މެދުކަނޑައިލަންޖެހުމާ ގުޅިގެން ފަސިންޖަރުންނށް ދަތިތަކާއި ތުރާތައް ކުރިމަތިވާތީ މައާފަށް އެދިފައެވެ. އަދި އެކުންފުނީގެ ބެލުމުގެ ދަށުގައި ހުރި އެއާޕޯޓުތަކުން ފޯރުކޮށްދޭ ހިދުމަތުގެ ފެންވަރު ރަނގަޅުކުރުމަށް ކެނޑިނޭޅި މަސައްކަތްކުރަމުންދާ ކަމުގެ ޔަގީންކަން އެ ކުންފުނިން ދީފައިވެއެވެ. 

ހިދުމަތް މެދުކަނޑައިލުމަށްފަހު އަލުން އެއާޕޯޓުގެ ހިދުމަތް ލިބޭނެ އިންތިޒާމު ހަމަޖެހުނު ނަމަވެސް މޯލްޑިވިއަންގެ ޝެޑިއުލް ދަތުރުތައް އަލުން ފަށާނީ ކޮންއިރަކު ކަމެއް މިހާތަނަށް މޯލްޑިވިއަންއިން އިއުލާނުނުކުރެއެވެ. 

2020 ވަނަ އަހަރު ހުޅުވި ފުނަދޫ އެއާޕޯޓުގެ ރަންވޭގެ ދިގުމިނުގއި 1،200 މީޓަރު އަދި ފުޅާމިނުގައި 30 މީޓަރު ހުރެއެވެ. އަދި 90 މީޓަރުގެ ޓެކްސީވޭއެއް އަދި 150 މީޓަރު ދިގު 50 މީޓަރު ފުޅާ އޭޕްރަނެއްވެސް އެއާޕޯތުގައި ހިމެނެއެވެ.