ޓައިޓެނިކް އުޅަނދުގެ ކާރިސާގައި 700 އަށްވުރެ ގިނަ ފަސިންޖަރުން ސަލާމަތްކުރި ބްރިޓިޝް ސްޓީމްޝިޕްގެ ކެޕްޓަނަށް ހަދިޔާ ކުރެވުނު ރަން، ޖީބު ގަޑިއެއް ނީލަމުގައި ރެކޯޑު އަގެއްގައި ވިއްކާލައިފިއެވެ. މި ގަޑި ވިއްކާލެވިފައިވަނީ 1.56 މިލިއަން ޕައުންޑް (1.97 މިލިއަން ޑޮލަރު) އަށެވެ.

18 ކެރެޓްގެ ރަނުން ޓިފަނީ އެންޑް ކޯއިން ތައްޔާރުކޮށްފައިވާ މި ގަޑި ހަދިޔާކޮށްފައިވަނީ އާރްއެމްއެސް  އުޅަނދުގެ ކެޕްޓަން ސަރ އާތަރ ރޮސްޓްރޮންއަށް، 1912 ވަނަ އަހަރު އޭނާ ސަލާމަތްކުރި ފަސިންޖަރުންގެ ފަރާތުންނެވެ.

ވިލްޝަޔަރގެ ނީލަންކިއާ ފަރާތް ކަމަށްވާ ހެންރީ އޯލްޑްރިޖް އެންޑް ސަންއިން ބުނެފައިވަނީ މިއީ ޓައިޓެނިކްގެ ހަނދާނީ އެއްޗަކަށް އެންމެ ބޮޑު އަގެއްގައި ވިއްކާލެވުނު އެއްޗެއް ކަމަށާއި، މި ގަޑި ގަނެފައިވަނީ އެމެރިކާގެ އަމިއްލަ ފަރުދެއް ކަމަށެވެ.

މި ވިއްކާލުމުން ދައްކުވައިދެނީ އަލިފާނުގެ ހާދިސާއަކާ ގުޅިގެން ފެނުގައި ޣަރަޤުވި މި އުޅަނދާ މެދު މީހުން ދެކޭ ޝައުޤުވެރިކަން ދެމިއޮތްކަމެވެ.

ސަރ އާތަރ ރޮސްޓްރޮން ވަނީ ނިއު ޔޯކުން ޔޫރަޕަށް ދަތުރުކުރަމުންދިޔަ ކާޕަތިއާގެ މަގު ބަދަލުކޮށްފައެވެ. އެއީ އުޅަނދުގެ ވަޔަރލެސް އޮޕަރޭޓަރަށް "އައިސްގަނޑަކާ ޖެހިއްޖެ، އަވަހަށް އަންނާށޭ" ބުނެ ފޮނުވި މެސެޖެއް ލިބުމާ ގުޅިގެންނެވެ.

ކާޕަތިއާ ވަނީ ފުލް ސްޕީޑުގައި ދަތުރުކޮށް، 1912 ވަނަ އަހަރުގެ އޭޕްރީލް 15 ވަނަ ދުވަހު އުތުރު އެޓްލާންޓިކްގައި ޓައިޓެނިކް ފެނުގައި ޣަރަޤުވިތާ ދެ ގަޑިއިރު ފަހުން އެ ސަރަހައްދާ ހަމައަށް ގޮސްފައެވެ.

މި ގަޑި ސަރ އާތަރަށް ހަދިޔާކޮށްފައިވަނީ ޓައިޓެނިކްގައި ދަތުރުކުރި އެންމެ މުއްސަނދި މީހާ ކަމަށްވާ ޖޯން ޖޭކަބް އަސްޓަރގެ އަނބިކަނބަލުންނާއި، ޓައިޓޭނިކް އަަޑިއަށް ދިޔަ ހާދިސާގައި ގެއްލުނު އިތުރު ދެ މުއްސަނދި ވިޔަފާރިވެރިންގެ އަނބިކަނބަލުންނެވެ. މި ހާދިސާގައި 1،500 އަށްވުރެ ގިނަ ފަސިންޖަރުންނާއި ފަޅުވެރިން ވަނީ މަރުވެފައެވެ.

މި ގަޑީގައި ލިޔެފައިވަނީ "ޓައިޓެނިކްގެ ތިން ސަލާމަތްތެރިން ކަމަށްވާ މިސިސް ޖޯން ބީ ތޭޔަރ، މިސިސް ޖޯން ޖޭކަބް އަސްޓަރ އަދި މިސިސް ޖޯޖް ޑީ ވައިޑެނަރގެ ފަރާތުން ހިތުގެ އަޑިން ޝުކުރުވެރިކަމާއެކު ކެޕްޓަން ރޮސްޓްރޮންއަށް ހަދިޔާކުރެވުނު، 1912 ވަނަ އަހަރުގެ އޭޕްރީލް 15" މިފަދައިންނެވެ.

ނީލަމުގައި ގއި ގަޑިވިއްކި ފަރާތުން ބުނެފައިވާ ގޮތުގައި، ސަރ އާތަރަށް މި ހަދިޔާ ލިބިފައިވަނީ މިސްޓަރ އަސްޓަރގެ އަނބިކަނބަލުން އިންތިޒާމުކުރި މެންދުރުގެ ކެއުމެއްގައި، ނިއު ޔޯކް ސިޓީގެ ފިފްތު އެވެނިއުގައި ހުރި އެ ޢާއިލާގެ ގަނޑުވަރުގައެވެ.

"މި ހަދިޔާ ދެވުނީ މައިގަނޑު ގޮތެއްގައި ރޮސްޓްރޮންގެ ހިތްވަރުގަދަ ކަމަށް ޝުކުރު އަދާކުރުމުގެ ގޮތުން. އެއީ މިސްޓަރ ރޮސްޓްރޮން ނެތްނަމަ، އެ 700 މީހުން ދިރި ނުތިބީސް،" ނީލަންވިއްކާ ފަރާތުގެ އެންޑްރޫ އޯލްޑްރިޖް ބުނެފައިވެއެވެ.

މީގެ ކުރިން ޓައިޓެނިކްގެ ހަނދާނީ އެއްޗެއްގެ ގޮތުގައި އެންމެ މަތީ އަގެއްގައި ވިއްކާލެވިފައިވަނީ މިސްޓަރ އަސްޓަރގެ ހަށިގަނޑުން ލިބުނު ރަން ޖީބު ގަޑިއެކެވެ. މި ގަޑި ވިއްކާލެވިފައިވަނީ މިދިޔަ އޭޕްރީލް މަހު 1.175 މިލިއަން ޕައުންޑަށް، ހަމަ މި ނީލަންވިއްކާ ފަރާތުންނެވެ.

އޭގެ ކުރިން، ޓައިޓެނިކް ޣަރަޤުވަމުން ދިޔައިރު ކުޅެވުނު ވަޔަލިން ވަނީ 11 އަހަރު ވަންދެން ޓައިޓެނިކްގެ ހަނދާނީ އެއްޗެއްގެ ގޮތުގައި އެންމެ މަތީ އަގެއްގައި ވިއްކާލެވުނު އެއްޗެއްގެ ރެކޯޑު ހިފަހައްޓާފައެވެ. މި ވަޔަލިން 2013 ވަނަ އަހަރު ވިއްކާލެވިފައިވަނީ 1.1 މިލިއަން ޕައުންޑަށެވެ.

މިސްޓަރ އޯލްޑްރިޖް ބުނެފައިވާ ގޮތުގައި މި އަހަރު ދެފަހަރަށް މި ރެކޯޑު ބިންދާލެވިފައިވުމުން ދައްކުވައިދެނީ ޓައިޓެނިކާ ގުޅުންހުރި ތަކެތި "އަބަދުވެސް މަދުވަމުންދާ އަދި އޭގެ ޑިމާންޑް އިތުރުވަމުންދާ" މިންވަރެވެ.