ENGLISH
26 ނޮވެމްބަރު 2024
ކޮންމެ ގައިދީ އަކަށް މަހަކު 27،000 އެއްހާ ރުފިޔާ ހޭދަވޭ: އިޙްސާން
18 ނޮވެމްބަރު 2024
|
ވަޒީރު ޢަލީ އިހްސާން / ފޮޓޯ: ދާޚިލީ ވުޒާރާ
އެންމެ މަޤްބޫލު
ޖަލު ބަންދުގައި ބަހައްޓާފައި ހުންނަ ކޮންމެ ގައިދީ އަކަށް، މަހެއްގެ މައްޗަށް 27،000 ރުފިޔާ ހޭދަވާ ކަމަށް ދާޚިލީ ސަލާމަތާ ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.
"ދިވެހި ދައުލަތުން މިހާރުވެސް އެބަ ޚަރަދުކުރޭ 27،000 އަކަށް ރުފިޔާ ކޮންމެ ބޮލަކަށް މަހަކު. މިއީ ވަރަށް ބޮޑު އަދަދެއް. އެވްރެޖް ރައްޔިތަކު 24 ގަޑިއިރު މަސައްކަތް ކޮށްގެން އެއްމަސް ދުވަހުގެ މަސައްކަތަށް މި ލިބެނީ މަހަކު 15،000 ރުފިޔާ. އެހެންވީމާ އަޅުގަނޑުމެން 27،000 ޚަރަދުލުރަންޖެހޭ ސަބަބެއް ނެތް. އަޅުގަނޑުމެން މިއަށް މޮޑެލް އަކަށް ބަލާލިއިރުގައި، ސިންގަލް ޕްރިޒަން ކޮމްޕެލެކްސް އެއް އަޅައިގެން މި ޚަރަދު ވަރަށް ބޮޑުތަނުން ކުޑަ ކުރެވޭ،" - ވަޒީރު ޢަލީ އިހްސާން ވިދާޅުވިއެވެ.
ވަޒީރު މިހެން ވިދާޅުވެފައިވަނީ ސަރުކާރަށް އަހަރު ފުރުމާއި ގުޅިގެން ޓީވީއަކުން ގެނެސްދިން ޕްރޮގްރާމެއްގައި ވާހަކަ ދައްކަވަމުންނެވެ. ރާއްޖޭގައި ޖަލު ހަދާފައިވަނީ ޖަލު ހަދަން ޖެހޭ އުސޫލުން ނޫން ކަމަށާއި އެކި ކަންކަމަށް ބެހެއްޓިފައި ހުރި ގުދަން ތަކުގައި ކުށްވެރިން ބައިތިއްބަން ފަށައި، އެތަންތަން އިތުރަށް ތަރައްގީ ވަމުން އައިސްފައިވާ ކަމަށް ވިދާޅުވިއެވެ. އަދި އެކަމަށް ޖުމްލަ ހައްލެއް ގެނައުމުގެ މަސައްކަތް އެއްވެސް އިރެއްގައި ކޮށްފައި ނުވާ ކަމަށެވެ.
ވަޒީރު ވިދާޅުވިގޮތުގައި ސެންޓްރަލް ޖަލެއް އެޅުމުގެ އެންމެ މުހިންމު ބޭނުމަކީ، ގައިދީން އެކި ރަށް ރަށުގައި ބައިތިއްބަން ޖެހުމުން ގައިދީއެއްގެ ބޮލަށް ކުރަންޖެހޭ ޚަރަދު ބޮޑުވުން ކަމަށެވެ.
ގައިދީން ސެކިޔުރިޓީއަށް ބަލައިގެން، ނުވަތަ ކުށް ތަކަށް ބަލައިގެން ނޫނީ، އަންހެން، ފިރިހެން، ކުޑަކުދިން އަދި ބިދޭސީން ގޮތަށް ބަލައިގެން ބަހާލަން ބެލި ނަމަވެސް ސިންގަލް ޕްރިޒަން ކޮމްޕްލެކްސް އަކީ މުހިންމު ކަމެއް ކަމަށް އިހްސާން ވިދާޅުވިއެވެ.
އަދި ނަފްސާނީ މައްސަލަ ހުންނަ ގައިދީންނަށްވެސް ފަރުވާ ދެވޭނެ ނިޒާމެއް ހޯދަން ޖެހޭ ކަމަށާ، ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާ ތަކުގައި އެކަށަ އަޅާފައިވާ މިންގަނޑުތައް ވެސް ޖަލުގައި ބެހެއްޓުން މުހިންމު ކަމަށްވާއިރު، އައު ޖަލު އެޅެނީ އެ ހުރިހާ ކަންކަމަށް ބަލައިގެން ކަމަށްވެސް އިހްސާން ވިދާޅުވިއެވެ.
