ގުޅީފަޅު ހިއްކުމުގެ މަޝްރޫޢުގެ 70 އިންސައްތަ މަސައްކަތް ނިމިފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު  ވިދާޅުވެއްޖެއެވެ. އަދި މިއަންނަ އަހަރުގެ ތެރޭގައި މުޅި ގުޅީފަޅު ހިއްކާ ނިންމާ ލެވޭނެ ކަމަށް އެމަނިކުފާނު ވިދާޅުވެފައެވެ.

މީގެއިތުރުން، ހުޅުމާލޭ ފޭސް 3 ހިއްކުމުގެ މަސައްކަތްވެސް ކުރިއަށްދާކަމަށް ރައީސް ވިދާޅުވިއެވެ. މި ސަރުކާރު ހަވާލުވިއިރު އެސަރަޙައްދުގެ 17 އިންސައްތަ ހިއްކާފައިވާއިރު، މިހާރު 38 އިންސައްތަ ހިއްކާ ނިމިފައިވާ ކަމަށް އެމަނިކުފާނު ވިދާޅުވިއެވެ. އަދި ކުރިއަށް އޮތް 6 މަސްދުވަހުގެ ތެރޭގައި އެތަން ހިއްކާ ނިންމާ ލެވޭނެ ކަމަށް ވެސް ރައީސް އިޢުލާން ކުރެއްވިއެވެ.

ގިރާވަރު ފަޅުގެ ހިއްކުމުގެ މަސައްކަތްވެސް ކުރިއަށް ދާކަމަށާއި މި ސަރުކާރު ހަވާލުވިއިރު 19 އިންސައްތަ ހިއްކާފައިވާއިރު، މިހާރު 33 އިންސައްތަ ހިއްކިފައި ވާކަމަށް އެމަނިކުފާނު ހާމަކުރެއްވިއެވެ.

ރައީސް މުޢިއްޒު އިތުރަށް ވިދާޅުވިގޮތުގައި، ކުރީގެ ސަރުކާރުން ގުޅީފަޅު ހިއްކުމުގެ މަޝްރޫޢު ހަވާލުކޮށްފައިވަނީ ބޭރުގެ ފަރާތަކަށް ގިނަ ބިންތަކެއް ލިބޭގޮތަށް، ޤަވާޢިދާ ޚިލާފަށް ހަދާފައިވާ އެއްބަސްވުމެއްގެ ދަށުންނެވެ. ނަމަވެސް، މިހާރުގެ ސަރުކާރުން އެ އެއްބަސްވުމުން ނިކުމެ، ރައްޔިތުންނަށް އެންމެ ފައިދާހުރި ގޮތަށް، އެންމެ ކުޑަ ޚަރަދަކުން އެތަން ހިއްކުމުގެ މަސައްކަތް ކުރިއަށް ގެންދަވާކަމަށް ރައީސް ވިދާޅުވިއެވެ.