ދިވެހި ރާއްޖޭގައި ދެން ފެންނާނީ ސަރަޙައްދީ ތަރައްޤީގެ އާ ބާބެއް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، އެމަނިކުފާނުގެ ސަރުކާރަށް އެއް އަހަރު ފުރުން ފާހަގަކުރެއްވުމަށް، "ހަފުތާ 52- ރައްޔިތުންނާއެކު ކުރިއަށް" ނަމުގައި ރޭ ބޭއްވި ޚާއްޞަ އިހުތިފާލުގައި ރައްޔިތުންނާ މުޚާޠަބުކުރައްވަމުންނެވެ.

ރައީސް މުޢިއްޒު ވިދާޅުވީ، ރާއްޖޭގެ އުތުރާއި ދެކުނުގައި މަތީ ފަންތީގެ ޚިދުމަތްތަކާއެކު އަރބަން ރީޖަން ތަޢާރަފުކޮށް، މިހާރު އިޢުލާނުކޮށްފައިވާ ފަދައިން ރާއްޖޭގެ އެކި ކަންކޮޅުތަކުގައި ހަތް އާރބަން ސެންޓަރު ތަރައްޤީކުރައްވާނެ ކަމަށެވެ. ރައީސް އިތުރަށް ވިދާޅުވީ، އެމަނިކުފާނު އެދިވަޑައިގަންނަވަނީ އެންމެންނަށް ވެސް އެއް ފެންވަރެއްގެ ރަނގަޅު ޚިދުމަތްތައް ލިބުން ކަމަށާއި، މި ކަންކަމުގައި ރައްޔިތުންގެ ބަސް ހޯއްދަވާނެ ކަމަށެވެ.

ސަރުކާރުގެ އަމާޒުތަކުގެ ތެރޭގައި، އާބާދީ އެއްފަސްކުރެވެންދެން ވެސް، ހުރިހާ ޚިދުމަތްތަކެއް ހުރިހާ ރަށަކުން ލިބޭނޭ ގޮތް ފަހިކޮށްދިނުން ހިމެނޭ ކަމަށް ރައީސް ފާހަގަކުރެއްވިއެވެ. މީގެ ތެރޭގައި، އޭޓީއެމް ނެތް ހުރިހާ ރަށްތަކުގައި އޭޓީއެމް ޚިދުމަތް ފެށުމާއި، ކޮންމެ ރަށަކުން އެސް.ޓީ.އޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުން ހިމެނެއެވެ.

އިތުރު މުހިންމު ކަންތައްތަކުގެ ތެރޭގައި، ހުރިހާ އަތޮޅަކަށް އާރް.ޓީ.އެލްގެ ޚިދުމަތް ފުޅާކުރުމާއި، އެހީތެރިކަން ބޭނުންވާ ފަރާތްތަކަށް ސަބްސިޑީ އާއި އާސަންދަ އަދި އިޖުތިމާޢީ ރައްކާތެރިކަން، ސަލާންޖަހަން ނުޖެހޭ މިންވަރަށް ފުރިހަމަކުރުން ހިމެނެއެވެ.

ރައީސް މުޢިއްޒު އިޢުލާންކުރެއްވި ގޮތުގައި، ޕޭ ހާމަނައިޒްކުރުމުގެ ނިޒާމުގެ ތެރެއިން މިހާރު މުސާރަ ބޮޑު ނުވެ ހުރި ސިވިލް ސަރވަންޓުންގެ މުސާރަ އަންނަ އަހަރު ބޮޑުކުރެވޭނެއެވެ. އަދި 2026 ގެ ނިޔަލަށް ޖުޑިޝަރީގައި މަސައްކަތްކުރާ ހުރިހާ މަސައްކަތްތެރިންގެ މުސާރަ ބޮޑުކުރެވޭނެ ކަމަށް ވެސް އެމަނިކުފާނު ވިދާޅުވިއެވެ.