މިދިޔަ ސަރުކާރުން ގެދޮރުވެރިކަމުގެ ސްކީމްގެ ދަށުން ދޫކޮށްފައިވާ ފްލެޓްތަކާ މެދު އިހުމާލުވެފައިވާކަމާއި 4،000 ފްލެޓް ލިބޭކަމަށް ލިސްޓްކުރި މީހުންގެ ތެރޭގައި ފޯމު ހުށަނާޅައި އައިޑީކާޑު ދައްކައިގެން ވެސް ފްލެޓް ދޫކޮށްފައި އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. 

އެމަނިކުފާނު މިހެން ވިދާޅުވެފައިވަނީ މި ސަރުކާރަށް އެއް އަހަރު ފުރުން ފާހަގަކުރުމަށް ރޭ ބޭއްވި "ހަފްތާ 52" ރަސްމިއްޔާތުގައެވެ.

ފްލެޓް ލިސްޓާމެދު ގިނަ ބަޔަކު ކަންބޮޑުވުން ފާޅުކުރިކަމަށާއި، އެންޓި ކޮރަޕްޝަން ކޮމިޝަން (އޭސީސީ) އިން މި މައްސަލައިގެ ތެރެއްށްވަދެ ހިންގި ތަހުގީގުން އެންގިފައިވާގޮތުން ލިސްޓުގައި ހިމެނޭ ގިނަ މީހުންނަކީ އުސޫލުން ބޭރުން ފްލެޓް ލިބިފައިވާ މީހުންކަން އެނގިގެންދިޔަ ކަމަށް ރައީސް ވިދާޅުވިއެވެ. މީގެ އިތުރުން ޝަރުތު ހަމަނުވާ އެތައް ބަޔަކަށް ޕޮއިންޓް ދީފައިވާކަން ވެސް ރައީސް ފާހަގަކުރެއްވިއެވެ.

ކުރީ ސަރުކާރުން ފްލެޓް ދޭން ނިންމާފައިވާ 60 އިންސައްތަ މީހުންގެ ޝަރުތު ހަމަނުވާކަމަށް އޭސީސީން ބުނެފައިވެއެވެ. 

މީގެ އިތުރަށް ރައީސް ވިދާޅުވީ ކުރީ ސަރުކާރުން އެކުލަވާލި ގެދޮރުވެރިޔާ ކޮމިޓީގައި ތިބި ސިޔާސީ ފަރާތްތަކަށްް ފްލެޓް ލިބޭގޮތަށް މާކްސް ބަދަލުކޮށްފައިވާ ކަމެވެ. ސިޔާސީ ގޮތުން ނުފޫޒުގަދަ އާއިލާއަކަށްވީތީ ނުވަތަ ސިޔާސީގޮތުން ނުފޫޒުގަދަ މަގާމެއްގައި ހުރެ އެކަމުގެ މަންފާ ނަގާފައިވާ ކަމަށް ވެސް ރައީސް ވިދާޅުވިއެވެ. 

އެމަނިކުފާނު ވިދާޅުވީ އެންމެ އިސްކަމެއް ދެއްވައިގެން ކުރައްވާ އެއްކަމަކީ ގޯއްޗާއި ފްލެޓް އިންސާފުވެރިކަމާ އެކު ރައްޔިތުންނަށް ދިނުން ކަމެވެ.