މަސައްކަތް ކުރައްވަނީ ދެފުށްފެންނަ ސަރުކާރެއް ޤާއިމުކުރައްވަން ކަމަށް ރައީސް ޑޮކްޓަރ މުހައްމަދު މުއިއްޒު ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ރޭ ބޭއްވި ރަސްމިއްޔާތުގައި ރައީސް ވިދާޅުވީ ރައްޔިތުންގެ ސުވާލުތަކަށް ޖަވާބު ދިނުމަށް "ރައްޔިތުންގެ އަޑު" ގެ ނަމުގައި ޕޯޓަލްއެއް ރަޖިސްޓްރީކޮށްފައިވާ ކަމަށާއި، މިހާތަނަށް 819 ސުވާލު ލިބިވަޑައިގެންފައިވާ ކަމަށެވެ. އޭގެ ތެރެއިން 773 ސުވާލަށް ވަރަށް ތަފްސީލުކޮށް ޖަވާބު ދެއްވާފައިވާ ކަމަށް ރައީސް ވިދާޅުވިއެވެ.

މީގެ އިތުރުން، އެކި މިނިސްޓްރީތަކުން 73 ޕްރެސް ކޮންފަރެންސް ބާއްވައި، 791 ފަހަރު އެކި މިނިސްޓަރުން މީޑިއާތަކަށް އިންޓަވިއު ދެއްވާފައިވާ ކަމަށް ރައީސް މުއިއްޒު ވިދާޅުވިއެވެ. 

މީގެއިތުރުން މީޑިއާތައް ބާރުވެރިކުރުވަން މަސައްކަތް ކުރައްވާ ކަމަށާއި މީޑިއާތައް ބާރުވެރި ކުރުވުމަށްޓަކައި މި ސަރުކާރުގެ ފުރަތަމަ  ބަޖެޓުގައި މީޑިއާތަކަށް ފައިސާ ދޭން ހިމަނާފައި ވާނެ ކަމަށް ރައީސް ވިދާޅުވިއެވެ.