ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް އަމިއްލަ މެމްބަރަކު ރައްޔިތުންގެ މަޖިލީހަށް ހުށަހަޅުއްވާފައިވާ ބިލް، ސަރުކާރު ހިންގާ ޕާޓީ, ޕީއެންސީން, ބޭރު ކޮށްލާނެ ކަމަށް ރައީސް ޑރ. މުހައްމަދު މުއިއްޒު  ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ރޭ ބޭއްވި ރަސްމިއްޔާތުގައި ރައީސް މުއިއްޒު ވަނީ ނޫސްވެރިކަމުގެ މިނިވަން ކަމަށް ވެސް އަލިއަޅުއްވާލައްވައިފައެވެ. އެގޮތުން ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު މަޖިލީހަށް ހުށަހަޅުއްވާފައިވާ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އެއްކޮށްލުމުގެ ބިލާ ގުޅޭ ގޮތުން ރައީސް ވަނީ ވާހަކަފުޅު ދައްކަވައިފައެވެ.

ރައީސް މުއިއްޒު ވިދާޅުވީ އެ ބިލުގައި ވަނީ އެ މަނިކުފާނު ގަބޫލުފުޅު ކުރައްވާ ސިޔާސަތެއް ނޫން ކަމަށާއި، މީޑިއާތައް ކޮންޓްރޯލް ކުރާހިތްޕުޅު ނުވާ ކަމަށެވެ. އޭގެ ބަދަލުގައި ބޭނުންފުޅުވަނީ މީޑިއާތަކަށް މިހާރަށް ވުރެ ބޮޑަށް މިނިވަންކަން ދޭން ކަމަށް ވެސް ވިދާޅުވިއެވެ.

މީގެ އިތުރުން، މީޑިއާތަކަށް ހެޔޮ އަގުގައި އޮފީސް ހިންގާނެ ޖާގަ ދިނުމަށް ހުޅުމާލެއިން އިމާރާތެއް ހަމަޖައްސައި، ގަވައިދަށް ފެތޭ ހުރިހާ މީޑިއާތަކަށް، އެސްޓީއޯއިން އަޅަން ފެށި ހޮޓަލުން އޮފީސް ޖާގަ ލިބޭނެ ކަމަށް ވެސް ރައީސް މުއިއްޒު ވިދާޅުވިއެވެ.

ރަސްމިއްޔާތަށް ފަހު ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ވެރިކަން ކުރާ ޕާޓީގެ މެޖޯރިޓީ އޮތް މަޖިލީހުން އެ ބިލް ބޭރުކުރާނެ ކަމަށެވެ. އަދި އެ ބިލް ބަލައި ނުގަންނާނެ ކަމަށް ވެސް ވިދާޅުވިއެވެ.

ރައީސް މުއިއްޒު އިތުރަށް ވިދާޅުވީ މަސައްކަތްކުރައްވަނީ ދެފުށް ފެންނަ ސަރުކާރެއް ގާއިމްކުރަން ކަމަށާއި، ރައީސް އޮފީހަށް ހުށަހަޅާފައިވާ އާރުޓީއައިތަކުގެ 91 ޕަސެންޓަށް ޖަވާބުދީފައިވާ ކަމަށެވެ. އަދި ހުރިހާ މިނިސްޓްރީއަކުން ކުރާ ކަންތައްތައް، 'ސަރުކާރު' ވެބްސައިޓުގައި އަޕްލޯޑް ކުރަމުންދާ ކަމަށާއި މީގެ ކުރިން މައުލޫމާތު ހާމަނުކުރާ ވަރަށް ހާމަކުރަމުންދާ ކަމަށް ވެސް ވިދާޅުވިއެވެ.

ނަމަވެސް، ނޫސްވެރިން ވެސް އަމަލުކުރަންޖެހޭ އުސޫލެއް އެބައޮތް ކަމަށާއި، ތެދު ބަހުން ނޫސްވެރިކަން ކުރާ ނަމަ ކޮންމެ ކަމެއް ހާމަކުރިއަސް ވަރިހަމަ ކަމަށް ރައީސް މުއިއްޒު ވިދާޅުވިއެވެ.

މީޑިއާތަކުގެ ބޮޑު ކަންބޮޑުވުމެއް އޮތް މި ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރައްވާ ހަތަރު މެންބަރަކާއި މީޑިއާތަކުން އައްޔަންކުރާ ތިން މެންބަރެކެވެ. އަދި އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

މި ބިލުގައި އިތުރަށް ހިމެނިފައިވާ ގޮތުން، މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި، ވަކިވަކި ނޫސްވެރިން 5،000 ރުފިޔާ އާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބަޔާންކޮށްފައިވެއެވެ.