މިއީ ދެ މޫސުން ބެދޭ ދުވަސްވަރު ކުރާ ވިއްސާރަ ކަމަށާއި ކުރިއަށް އޮތް 24 ގަޑިއިރު ތެރޭ ވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް މޫސުމާބެހޭ ޤައުމީ އިދާރާ (މެޓް) އިން ބުނެފި އެވެ. 

މެޓުން ބުނީ ބ. އަތޮޅުން ފެށިގެން ވ. އަތޮޅާ ހަމައަށް މިއަދު މެންދުރު އެކަކާ ހަމައަށް ރީނދޫ ސަމާލު ނެރެފައިވާ ކަމަށެވެ. މިއީ ހުޅަނގު މޫސުން ނިމި އިރުވައި މޫސުން ފެށެން ކައިރިވުމުން ކުރާ ވިއްސާރައެއް ކަމަށް ވެސް މެޓުން ބުނެއެވެ މި ވިއްސާރައިގައި މާލެއަށް ބޯކޮށް ވާރޭވެހި، މާލޭގެ ބައެއް މަގުތަކުގައި ވަނީ ފެންބޮޑުވެފައެވެ. 

މެޓް އޮފީހުން އިތުރަށް ބުނެފައި ވަނީ މިއަދު ރާއްޖެއަށް ބޯކޮށް ވާރޭވެހޭނެ ކަމަށް ލަފާކޮށްފައިވާ ކަމަށާއި، ކުރިއަށް އޮތް 24 ގަޑިއިރު ވެސް ވިއްސާރަ ކުރާނެ ކަމަށް ލަފާކުރެވޭ ކަމަށެވެ. މީގެ އިތުރުން، ޔެލޯ އެލާޓް ނެރެފައިވާ ސަރަހައްދުތަކަށް ބޯކޮށް ވާރޭވެހި ގުގުރާނެ ކަމަށާއި، ވިލާގަނޑުގައި 45 މޭލަށް ވައިގަދަވެ ކަނޑުތައް ވެސް ގަދަވާނެ ކަމަށް ވަނީ ލަފާކޮށްފައެވެ.

މުޅި ރާއްޖެއަށް 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 35 މޭލަށް ވައި ގަދަވާނެ ކަމަށް ވެސް މޫސުމާބެހޭ ޤައުމީ އިދާރާއިން ވަނީ ލަފާކޮށްފައެވެ.

މި މޫސުމުގެ ނުރައްކަލުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށް އާންމު ރައްޔިތުންނަށް މެޓް އޮފީހުން އިލްތިމާސްކޮށްފައިވެއެވެ.