ކުރީގެ ސަރުކާރުން ގެޒެޓް ކޮށްފައިވާ ފްލެޓު ލިސްޓު އަތުލުމަކީ މި ސަރުކާރުން ކުރާނެ ކަމެއް ނޫން ކަމަށާއި ނަމަވެސް ދޮގު މަޢުލޫމާތު ދީގެން ނުވަތަ މަކަރު ހަދައިގެން ފްލެޓު ހޯދާފައިވާ ފަރާތްތައް ލިސްޓުން އުނިވާނެ ކަމަށް ރައީސް ޑޮކްޓަރ މުޙައްމަދު މުޢިއްޒު ވެއްޖެ އެވެ.

ސަރުކާރަށް އެއް އަހަރު ފުރުން ފާހަގަކުރުމަށް ސޯޝަލް ސެންޓަރުގައި ރޭ ބޭއްވި ރަސްމިއްޔާތުގައި ރައީސް ވިދާޅުވީ ރަނގަޅު އަދި ތެދު މަޢުލޫމާތު ހުށަހަޅާފައިވާ ފަރާތްތަކުގެ ގޯތި ނުވަތަ ފްލެޓު އަތުނުލާނެ ކަމަށެވެ. އަދި ހުޅުމާލެ ފޭސް 2 އިން ގޯތި ދޫކޮށްފައިވަނީ މި އުސޫލުން ކަމަށް ވެސް އެމަނިކުފާނު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވި ގޮތުގައި، ހުޅުމާލެ ފޭސް 3، ގުޅިފަޅު އަދި ގިރާވަރުފަޅު ހިއްކުމުގެ މަޝްރޫޢު ނިމުމުން އެ ސަރަޙައްދުތަކުން ވެސް ގޯތި ދޫކުރާނެއެވެ.

ކުރީގެ ސަރުކާރުން ހުޅުމާލޭގައި އިމާރާތްކުރަން ފެށި 4،000 ފްލެޓު ލިބޭ ފަރާތްތަކުގެ ލިސްޓު ރިވިއުކޮށް، މިދިޔަ މަސް ނިމުމުގެ ކުރިން އާންމުކުރާނެ ކަމަށް ކުރިން އިޢުލާންކޮށްފައިވީ ނަމަވެސް، އަދިވެސް އެ ލިސްޓު އާންމުކޮށްފައެއް ނުވެއެވެ. 

ރައީސް މުޢިއްޒު ވިދާޅުވި ގޮތުގައި، ފްލެޓު ލިސްޓުގައި ބަލަންޖެހޭ ކަންތައްތައް ވަރަށް ގިނައެވެ. އޭގެ ތެރޭގައި، ކުރީގެ ސަރުކާރުން އުފެއްދި ފްލެޓު ކޮމިޓީގެ ސިޔާސީ މެންބަރުންނަށް އުސޫލާ ޚިލާފަށް ފްލެޓު ލިބޭ ގޮތަށް މާކްސް ބަދަލުކޮށްފައިވާ ކަމަށް އެމަނިކުފާނު ވިދާޅުވިއެވެ. މީގެ އިތުރުން، ކުރީގެ ސަރުކާރުގެ އިސްވެރިންގެ ޢާއިލާތަކުގެ މެންބަރުންނާއި ނުފޫޒު ގަދަ ޢާއިލާތަކުގެ ގިނަ ބަޔަކަށް ފްލެޓުތައް ބަހާލާފައިވާ ކަމަށް ވެސް ރައީސް މުޢިއްޒު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ މި ހުރިހާ ކަމެއް ބަލައި، އިންސާފުވެރިކަމާއެކު މި މައްސަލަ ނިންމަވާނެ ކަމަށެވެ. އަދި ފްލެޓު ލިބޭ ފަރާތްތަކުގެ ލިސްޓު ނެރުމުގައި ލަސްވަމުންދާ ސަބަބަކީ މި ހުރިހާ ކަމެއް ބަލަމުންދާތީ ކަމަށް ވެސް ރައީސް ވިދާޅުވިއެވެ.

އެމަނިކުފާނު އިތުރަށް ވިދާޅުވި ގޮތުގައި، ސަރުކާރުގެ މަޤްޞަދަކީ ނަޒާހަތްތެރިކަމާއި އިންސާފުވެރިކަމާއެކު، އިޢުލާންކޮށްފައިވާ ޝަރުޠުތަކާއި ޕޮއިންޓް ދިނުމުގެ ނިޒާމާ އެއްގޮތަށް 4،000 ފްލެޓު ދޫކުރުމެވެ.

މީގެ އިތުރުން، ބައެއް ފަރާތްތަކަށް، ހަމައެކަނި އައިޑީ ކާޑު ހުށަހަޅައިގެން ވެސް ފްލެޓު ލިބިފައިވާ ކަމަށް ރައީސް މުޢިއްޒު ވިދާޅުވިއެވެ. އަދި މި ހުރިހާ ކަމަކާ ގުޅޭ ތަފްޞީލުތައް އާންމުކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.