ކުރިއަށް އޮތް އަހަރެއް ނުވަތަ ދެ އަހަރު ދުވަހުގެ ތެރޭގައި ފުޓްބޯޅަ ކުޅުން ހުއްޓާލާނެކަމުގެ އިޝާރާތެއް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ދީފި އެވެ.

ޔުއެފާ ނޭޝަންސް ލީގުގައި ޕޮލެންޑް އަތުން 1-5 އިން ޕޯޗުގަލް މޮޅުވި މެޗަށް ފަހު ނޫސްވެރިންނާ ވާހަކަ ދައްކަމުން ރޮނާލްޑޯ ބުނީ ކުޅުން ހުއްޓާލި ނަމަވެސް ކޯޗެއްގެ ގޮތުގައި މަސައްކަތް ނުކުރާނެ ކަމަށެވެ.

"އަހަރެންނަކަށް ނުފެނޭ އަހަރެން ޓީމެއް މެނޭޖް ކުރާ ތަނެއް. އެއީ އަހަރެންގެ ޕްލޭންތަކުގައި ހިމެނޭ ކަމެއް ނޫން. އަހަރެންގެ މުސްތަޤްބަލު އޮތީ ފުޓްބޯޅައިން ބޭރުގެ އެހެން ދާއިރާއަކުން. ނަމަވެސް ވަގުތު އައިސްޖެހުމުން ވާނެ ގޮތެއް ބުނަން އެނގޭނީ،" ރޮނާލްޑޯ ބުންޏެވެ. "އެކަން ކުރަންޖެހޭ ހާލަތު އައީމާ އަހަރެއް ނުވަތަ ދެ އަހަރުގެ ތެރޭގައި ކުޅުން ހުއްޓާލާނަން. ކަނޑައެޅިގެން ބުނާކަށް ނޭނގޭ."

މި ވަގުތު އޭނާ ކުޅެމުން އަންނަނީ ސައުދީގެ އަލް ނަސްރުއަށެވެ. އުމުރުން 39 އަހަރުވީ ނަމަވެސް ބައިނަލްއަގުވާމީ ފުޓްބޯޅައިގައި އަދިވެސް ރޮނާލްޑޯ އަންނަނީ ގިނަ ގޯލްތަކެއް ޖަހަމުންނެވެ. އެންމެ ފަހުން ޕޮލެންޑް އަތުން ޕޯޗުގަލް މޮޅުވި މެޗުގައި ރޮނާލްޑޯ ދެ ލަނޑުޖަހާފައިވާއިރު އޭގެތެރެއިން އެއްގޯލަކީ އޯވަހެޑް ކިކަކުން ރޮނާލްޑޯ ޖެހި ގޯލެކެވެ.

މި މެޗުން ހޯދި މޮޅާއެކު ޕޯޗުގަލް ވަނީ ނޭޝަންސް ލީގުގެ ކުއާޓާ ފައިނަލަށް ދަތުރުކޮށްފައެވެ.

އަލް ނަސްރަށް ބަދަލުވުމަށް ފަހު ރޮނާލްޑޯ ވަނީ ގިނަ ލަނޑުތަކެއް ޖަހައިފައެވެ. ރޮނާލްޑޯ ވަނީ ސައުދީ ކުލަބަށް ކުޅެދިން 85 މެޗުގައި 74 ގޯލު ޖަހައިފައެވެ. އަދި މި ފަހަރުގެ ސީޒަނުގެ ލީގުގައި އޭނާ ވަނީ ހަ ގޯލު ޖަހައިފައެވެ. ރޮނާލްޑޯ ބުނީ، އޭނާގެ ހިތްހަމަޖެހުމަށްޓަކައި ފުޓްބޯޅަ ކުޅުން ކުރިއަށްގެންދާނެ ކަމަށާއި، އަދި އޭނާގެ މޯޓިވޭޓްވެފައި ހުންނަހާ ހިނދަކު ކުޅުން ހުއްޓާލުމުގެ ވިސްނުމެއް ނުގެންގުޅޭ ކަމަށެވެ. 

މިދިޔަ އޮގަސްޓް މަހު ރޮނާލްޑޯ ބުނެފައިވަނީ ގައުމީ ޓީމަށް އޭނާ ކުޅުން ހުއްޓާލާނެކަން ކުރީބައިގައި ހާމަނުކުރާނެ ކަމަށާއި އެއީ ވަރަށް ވިސްނުމަށްފަހު އޭނާ ނިންމާނެ ނިންމުމެއް ކަމަށެވެ. އަދި އޭނާ ކްލަބް ފުޓްބޯޅަ އާއި ދުރަށް ދާނީ އަލް ނަސްރުގައި ކަމަށް ވެސް ވަނީ ބުނެފަ އެވެ.

ނޭޝަންސް ލީގުގައި ޕޯޗުގަލް ދެން ކުޅޭ މެޗުގައި އަންނަ އަންގާރަ ދުވަހު ނުކުންނާނީ ކްރޮއޭޝިއާއާ ދެކޮޅަށެވެ.