ނަފްސާނީ ބަލި މީހުންނަށް އެހީ ފޯރުކޮށްދިނުމުގެ ގޮތުން ތައާރަފްކުރި ހެލްޕްލައިން މެދުވެރިކޮށް މިހާތަނަށް ހާހަކަށްވުރެ ގިނަ މީހުންނަށް އެހީތެރިކަން ފޯރުކޮށްދީފައިވާކަމަށް ހެލްތު މިނިސްޓްރީން ބުނެފިއެވެ.

ނަފްސާނީ އެހީތެރިކަމަށް ތައާރަފް ކުރި ހެލްޕްލައިން 1677 މެދުވެރިކޮށް މިހާތަނަށް ޖުމްލަ 1184 މީހުންނަށް އެހީތެރިކަން ފޯރުކޮށްދީފައިވާކަމަށް އެ މިނިސްޓްރީން ބުނެފައިވެއެވެ. މި ހެލްޕްލައިންގެ ޙިދުމަތް 24 ލިބޭނެއެވެ. 

މިހާތަނަށް ހާހަކަށްވުރެ ގިނަ މީހުންނަށް ނަފްސާނީ އެހީތެރިކަން ފޯރުކޮށްދީފައިވާއިރު ހެލްތު މިނިސްޓްރީން މީގެކުރިން ބުނީ މި ހެލްޕް ލައިންގެ އަމާޒަކީ ނަފްސާނީ ހާލަތެއް ނުވަތަ އުނދަގޫތައް ތަޙައްމަލުކުރަމުންދާ އެކި އުމުރުފުރައިގެ މީހުންނަށް ކޮންމެ ގަޑިއެއްގައި ވެސް ގުޅާ އެހިދުމަތް ފޯރުކޮށްދިނުމަށް އުފައްދާފައިވާ ހެލްޕްލައިނެއް ކަމަށެވެ.

އަދި މި ނަންބަރުން ނަފްސާނީ ސިއްހަތުގެ ފުރަތަމަ އެހީގެ އިތުރުން މައްސަލަ ހައްލުކުރުމަށް އެހީތެރިވުމާއި މައުލޫމާތު ފޯރުކޮށްދިނުމާއި ހެދިފައިވާ އުސޫލުގެ ތެރެއިން ގުޅުން ހުރި ހިދުމަތްތަކަށް ރިފަރަލް ހެދިގެންދާނެ ކަމަށް ވެސް އެ މިނިސްޓްރީން ބުނެފައިވެއެވެ.

ރާއްޖޭގައި ކޮންމެ ފަސް މީހަކުން އެކަކު ޑިޕްރެޝަންގެ އަލާމާތްތައް ތަހައްމަލު ކުރަމުން ދާކަމަށް 2022 ވަނަ އަހަރު ކުރިއަށް ގެންދިޔަ ސްޓެޕް ސަރވޭއިން ދައްކައެވެ. އަދި ކޮންމެ 20 މީހަކުން އެކަކު ފުރާނައަށް ނުރައްކާތެރި ކަންކަން ކުރުމާއި އަމިއްލައަށް މަރުވުންފަދަ ހިޔާލު ގެންގުޅޭ ކަމަށް ވެސް އެ ދިރާސާއިން ދައްކައެވެ.