ޕެރޫގެ ވެރިރަށް ލިމާގައި ބޭއްވި އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓްގެ ތެރެއިން، ޗައިނާގެ ރައީސް ޝީ ޖިންޕިން އާއި އެމެރިކާގެ ރައީސް ޖޯ ބައިޑެން ބައްދަލުކުރައްވައި މުހިންމު މަޝްވަރާތަކެއް ކުރައްވައިފިއެވެ.

މި ބައްދަލުވުމުގައި ދެ ލީޑަރުން ވަނީ އަންނަ ޖެނުއަރީ މަހު އެމެރިކާގެ ރައީސްކަމާ ހަވާލުވާން ހަމަޖެހިފައިވާ ޑޮނަލްޑް ޓްރަމްޕްގެ ވެރިކަމުގައި ދެ ޤައުމުގެ ގުޅުން ކުރިއަށް ގެންދާނެ ގޮތާ މެދު މަޝްވަރާކުރައްވައިފައެވެ.

ބައްދަލުވުމުގައި ޝީ ޖިންޕިންގ ވިދާޅުވީ ޗައިނާއިން އެމެރިކާގެ އާ އިދާރާއާއެކު މުއާމަލާތްތައް ދެމެހެއްޓުމަށާއި، އެއްބާރުލުން އިތުރުކުރުމަށާއި، ތަފާތުތައް މެނޭޖްކުރުމަށް ތައްޔާރަށް ތިބި ކަމަށެވެ. އަދި ބައިޑެން ވިދާޅުވީ ދެ ޤައުމުގެ ދެމެދުގައި އޮންނަ ވާދަވެރިކަން ހަނގުރާމައަކަށް ބަދަލުވިޔަ ނުދިނުމަކީ ދެ ޤައުމުގެ ވެސް ޒިންމާއެއް ކަމަށެވެ.

ނަމަވެސް، ޓްރަމްޕް ރައީސްކަމާ ހަވާލުވުމާއެކު ދެ ޤައުމުގެ ގުޅުން އިތުރަށް ގޯސްވެދާނެކަމަށް ތަޙުލީލުކުރާ ފަރާތްތަކުން ލަފާކުރެއެވެ. މީގެ ސަބަބެއްކަމަށް ބެލެވެނީ ޓްރަމްޕް ވަނީ ޗައިނާއިން އެތެރެކުރާ މުދަލަށް 60 އިންސައްތައިގެ ޓެރިފް ނެގުމަށް ވައުދުވެވަޑައިގެންފައެވެ. އަދި ޗައިނާއާ ދެކޮޅު ސިޔާސަތު ގެންގުޅޭ ފަރާތްތައް ވަނީ މުހިންމު މަޤާމުތަކަށް އައްޔަންކޮށްފައެވެ.

ބައިޑެންގެ ވެރިކަމުގައި ވެސް ދެ ޤައުމުގެ ގުޅުމުގައި އެކި ކަންކަން ދިމާވެފައިވެއެވެ. މީގެ ތެރޭގައި ސްޕައި ބެލޫނުގެ މައްސަލައާއި ތައިވާނުގެ ވަށައިގެން ޗައިނާގެ އަސްކަރީ ބާރު ދެއްކުން ހިމެނެއެވެ. ނަމަވެސް ބައިޑެންގެ ވެރިކަމުގައި ވަނީ ޗައިނާއާ އެކުގައި އޮންނަ ވާދަވެރިކަން "ޒިންމާދާރުކަމާއެކު" މެނޭޖްކުރުމަށް މަސައްކަތް ކުރައްވައިފައެވެ.

ޓްރަމްޕްގެ ވެރިކަމުގައި ޗައިނާއާ ދޭތެރޭ ގެންގުޅޭނެ ސިޔާސަތާ މެދު ޗައިނާއިން އެންމެ ކަންބޮޑުވާ ކަމަކީ ޓްރަމްޕް ކަންކުރައްވާނެ ގޮތެއް ނޭގޭތީއެވެ.

ޖަރުމަނު މާޝަލް ފަންޑުގެ އިންޑޯ-ޕެސިފިކް ޕްރޮގްރާމްގެ މެނޭޖިންގ ޑިރެކްޓަރ ބޮނީ ގްލޭޒަރ ވިދާޅުވީ ޗައިނާއިން ޓްރަމްޕްގެ ޓީމާއެކު އަވަހަށް މަޝްވަރާކުރުމަށް އުންމީދުކުރާ ކަމަށެވެ. ނަމަވެސް ޓްރަމްޕް ޗައިނާގެ މުދަލަށް މަތީ ޓެރިފް ނެގުމަށް ނިންމައިފިނަމަ، ޗައިނާއިން ބަދަލު ހިފުމަށް ވެސް ތައްޔާރަށް ތިބިކަމަށް ގްލޭޒަރ ވިދާޅުވިއެވެ.

ބައްދަލުވުމުގައި ބައިޑެން ވިދާޅުވީ ޝީ ޖިންޕިންގ އާ އެކު އޮތް މަޝްވަރާތައް "ތެދުވެރި" އަދި "ސާފު" ކަމަށެވެ. ބައިޑެންގެ ދައުރުގައި ދެ ލީޑަރުން ވަނީ ތިން ފަހަރެއްގެ މަތިން ބައްދަލުކުރައްވާފައެވެ. މީގެ ތެރެއިން މުހިންމު ބައްދަލުވުމެއް ބޭއްވުނީ ފާއިތުވި އަހަރު ސަން ފްރަންސިސްކޯގައެވެ. މި ބައްދަލުވުމުގައި ދެ ފަރާތުން ވަނީ މަސްތުވާތަކެއްޗާ ދެކޮޅަށް މަސައްކަތްކުރުމާއި މޫސުމަށް އަންނަ ބަދަލުތަކާ ގުޅޭގޮތުން އެއްބަސްވުންތަކަކަށް އާދެވިފައެވެ.

ބައިޑެންގެ ވެރިކަމުގައި އޭޝިއާ ޕެސިފިކް ސަރަޙައްދުގައި ޗައިނާގެ ނުފޫޒު ކުޑަކުރުމަށްޓަކައި ދިފާޢީ އެއްބަސްވުންތައް ވަނީ ވަރުގަދަކޮށްފައެވެ. އަދި ޗައިނާއިން ތައިވާނަށް ހަމަލާދީފިނަމަ އެމެރިކާއިން ތައިވާން ދިފާޢުކުރާނެ ކަމަށް ވެސް ބައިޑެން ވަނީ ވިދާޅުވެފައެވެ.