މި ފަހުން ދިވެހިންގެ މަޤުބޫލުކަން ހޯދާފައިވާ ފިލްމް "ބިބީ" ސްޕެއިންގެ ސިޓީއެއް ކަމަށްވާ ލޮގްރޯނޯގައި އަޅުވަން ނިންމައިފިއެވެ. ލޮގްރޯނޯގައި ފިލްމު އަޅުވަން ހަމަޖެހިފައިވަނީ މިރޭ އެ ސިޓީގެ ގަޑިން 21:00ގައި އިނގިރޭސި ސަބްޓައިޓަލްސްއާއެކުގަ އެވެ. 

ޑާކު ރެއިންގެ ފަރާތުން އިތުރަށް ބުނީ މި މަހުގެ ފަހުކޮޅު ސްޕެއިންގެ މައި ސިޓީއެއް ކަމަށްވާ ބާސެލޯނާގައި ވެސް ބިބީ އަޅުވަން މަސައްކަތް ކުރަމުން އަންނަ ކަމަށެވެ.

"ބިބީ" އަކީ ޑާކްރެއިން އެންޓަޓެއިންމަންޓްއިން ޕްރޮޑިއުސް ކޮށްފައިވާ ކާމިޔާބު ދިވެހި ފިލްމެކެވެ. މި ފިލްމަށްދަނީ ބޮޑު މަގުބޫލުކަމެއް ލިބެމުންނެވެ. މާލޭގެ އިތުރުން ރާއްޖެތެރޭގެ ގިނަ ރަށްތަކެއްގައި ވެސް މި ފިލްމް އެޅުވުމުގެ މަސައްކަތްކުރަމުން ގެންދެއެވެ.

އެގޮތުން މި ފިލްމް އެންމެ ފުރަތަމަ އެޅުވުމަށް ހަމަޖެހިފައިވަނީ، މި މަހުގެ 18 ވާ ހުކުރު ދުވަހުގެ ރޭ ތިނަދޫ ސިޓީގައެވެ. 

މި ފިލްމު ތިނަދޫގައި އެޅުވުމަށް ތައްޔާރުވާއިރު ލީޑް ކާސްޓުގެ ތެރޭގައި ހިމެނޭ ޝަރަފް އަބްދުالله މި ފިލްމު ޕްރިމިއާ ކުރުމަށް ތިނަދޫއަށް ދިޔުމަށް ވަނީ ހަމަޖެހިފައެވެ. އަދި, ފިލްމުގެ ޕްރިމިއާއާއެކު މީޓް އެންޑް ގްރީޓް އިވެންޓެއް ވެސް ބޭއްވުމަށް ވަނީ ހަމަޖެހިފައެވެ.

މި ފިލްމުގެ ޑައިރެކްޓަރަކީ ޝަހުދާ މަމްދޫހުއެވެ. މިއީ އޭނާ ޑައިރެކްޓު ކުރާ ފުރަތަމަ ފީޗާ ފިލްމެވެ.