އިންޑިއާގެ އުއްތަރު ޕްރަދޭޝްގައި ހުންނަ، މަހާރާނީ ލަކްޝްމީބައި މެޑިކަލް ކޮލެޖް އެންޑް ހޮސްޕިޓަލްގެ ނިއޯނޭޓަލް އިންޓެންސިވް ކެއާ ޔުނިޓް (އެންއައިސީޔޫ)ގައި ރޯވެ، ތުއްތު 10 ކުއްޖަކު މަރިވެއްޖެއެވެ.

އިންޑިއާގެ ނޫސްތަކުން ބުނާ ގޮތުގައި އަލިފާން ރޯވުމަށް މެދުވެރިވީ އިލެކްޓްރިކް ޝޯޓް ސާކެޓެއްވުމުގެ ސަބަބުންނެވެ. އަދި މި ހާދިސާ ހިނގާފައިވަނީ ރޭ 10:45 ހާއިރު ކަމަށް ޑިސްޓްރިކްޓް މެޖިސްޓްރޭޓް (ޑީއެމް) އަވިނާޝް ކުމާރު ވިދާޅުވިއެވެ.

ހާދިސާ ހިނގި ވަގުތު އެންއައިސީޔޫގައި ގާތްގަޑަކަށް 54 ކުދިން އެޑްމިޓްކޮށްފައި ތިއްބެވެ.  އޭގެ ތެރެއިން 44 ކުދިން ސަލާމަތް ކޮށްފައިވާ ކަމަށް މީޑިއާތަކުން ރިޕޯޓުކުރެއެވެ. ނިޔާވި 10 ކުދިންގެ ތެރެއިން ހަތް ކުދިންގެ މައުލޫމާތު ދެނެގަނެވިފައިވާ ކަމަށްވެސް ކަމާ ބެހޭ އޮފިޝަލުންނާ ހަވާލާދީ މިޑިއާތަކުން ރިޕޯޓުކުރެއެވެ.

ހާދިސާ ހިނގިގޮތް ސާފުކޮށް އެނގޭނީ ތަހުގީގީ ރިޕޯޓް ލިބުމުން ކަމަށް ޕަތަކް ވިދާޅުވިއެވެ.

މި ހާދިސާގައި ގެއްލުން ލިބުނު ހުރިހާ ފަރާތްތަކަށް މާލީ އެހީތެރިކަން ފޯރުކޮށްދޭނެ ކަމަށް ސަރުކާރުން އިއުލާނުކޮށްފައިވާއިރު ނިޔާވި ތުއްތު ކުދިންގެ ކޮންމެ އާއިލާއަކަށް ފަސް ލައްކަ ރުޕީސް ދޭނެ ކަމަށާއި ސީރިއަސް އަނިޔާތައް ލިބުނު ކުދިންގެ އާއިލާތަކަށް 50،000 ރުޕީސް ދޭނެ ކަމަށް ޗީފް މިނިސްޓަ ޔޯގީ އަދިނާޔަތް ވަނީ އިއުލާނުކުރައްވާފައެވެ.