ޔުވެންޓަސްއިން ޕޮގްބާއާ ދެމެދު އޮތް އެއްބަސްވުން އުވާލައިފިއެވެ. އެއްބަސްވުން ރަސްމީކޮށް ނިމުމަކަށް ގެންނަން ހަމަޖެހިފައިވަނީ މިމަހުގެ 30 ވަނަ ދުވަހުން ފެށިގެންނެވެ.

މިއީ ކްލަބާއި ޕޮގްބާ މަޝްވަރާކުރެވި އެއްބަސްވެގެން ނިންމި ނިންމުމެކެވެ.  އެއްބަސްވުން ނިމުމަކަށް ގެނެސްފައި މިވަނީ މަނާ ބޭހަށް ޕޮޒިޓިވްވެ, ޕޮގްބާއަށް ދިން ދިގު މުއްދަތުގެ ސަސްޕެންޝަނަށް ލުއި ދީ އަންނަ އަހަރުގެ މާރޗް މަހު ކުޅެން ނިކުތުމުގެ ހުއްދަ ލިބިފައި ވަނިކޮށެވެ.

31 އަހަރުގެ މިޑްފީލްޑަރަށް ފެބްރުއަރީ މަހު ދިނީ 4 އަހަރުގެ ސަސްޕެންޝަނެކެވެ. ނަމަވެސް އޮކްޓޯބަރު މަހު އެސަސްޕެންޝަންގެ މުއްދަތު ވަނީ 18 މަހަށް ލުއި ކޮށްދީފައެވެ. އެއާއެކު ކުރިއަށް އޮތް ޖެނުއަރީ މަހު ޕްރެކްޓިސްއަށް ނިކުތުމުގެ ހުއްދަ ލިބޭނެއެވެ. އެކަމަކު ކުޅުމުގެ ހުއްދަ ލިބެނީ މާރޗް މަހުން ފެށިގެންނެވެ. ޔުވެންޓަސްއާ އެކު އޮތް އެއްބަސްވުން ނިމުމަކަށް ގެނެސްފައި މިވަނީ ކްލަބްގައި މަޑުކުރަން ބޭނުންވާކަމަށް ޕޮގްބާ ބުނެފައިވާ ދަނޑިވަޅެއްގައެވެ. ޕޮގްބާއަށް ސަސްޕެންޝަން ކުރިމަތިވީ އެސީޒަންގައި މާގިނަ ވަގުތު ކުޅުމުގެ ފުރުޞަތުވެސް ނުލިބިއެވެ. ފާއިތުވި ދެއަހަރުގެ ސީޒަންގައި ކުޅެން ފުރުޞަތު ލިބުނީ 162 މިނިޓެވެ. މިދިޔަ ސީޒަންގައި 5 މެޗުން ކުޅެން ފުރުޞަތު ލިބުނީ 51 މެޗެވެ.

ޖެނުއަރީ މަހު އާ ކްލަބަކާ ގުޅުމުގެ ފުރުޞަތު ޕޮގްބާއަށް އޮންނާނެއެވެ. ޕޮގްބާ ވަނީ އުނދަގޫ ވަގުތުވެސް ޔުވެންޓަސްއާއި އެކްލަބްގެ ސަޕޯޓަރުންގެ ފަރާތުން ލިބުނު އެއްބާރުލުން ފާހަގަކޮށްފައެވެ. އަދި ޔުވެންޓަސްއިން ވެސް ވަނި ޕޮގްބާއަށް ހެޔޮ އެދުންތައް ފޮނުވާފައެވެ. ޕޮގްބާ ވަނީ ފްރާންސް ގައުމީ ޓީމަށް 91 މެޗު ކުޅެފައެވެ. 2018 ވަނަ އަހަރުގެ ވަރލްޑްކަޕް ހޯދި ޓީމްގައި އޭނާ ހިމެނެއެވެ. އަދި ފައިނަލް މެޗުގައި ޕޮގްބާ ކްރޮއޭޝިޔާ ކޮޅަށް ލަނޑުވެސް ޖެހިއެވެ.