އިމާމުން ޖިންސާއި ޓީޝާޓު ފަދަ ނުރަސްމީ ހެދުން ލައިގެން އިމާމުވެ ނަމާދުނުކުރެވޭ ގޮތަށް އިމާމުންނާއި މުދިމުންގެ ސުލޫކީ މިންގަނޑެއް އިސްލާމިކް އެފެއާޒް މިނިސްޓްރީން އެކުލަވާލައިފިއެވެ.

އިސްލާމްދީނާއި ރާއްޖޭގެ ގާނޫނުއަސާސީ އާއި ގާނޫނުތަކާއި ގަވާއިދުތަކާއި އާންމު އިޖުތިމާއީ މިންގަނޑުތަކާ އެއްގޮތަށް މިސްކިތްތަކުގެ އިމާމުންނާއި މުދިމުން އަމަލުކުރޭތޯ ކަށަވަރުކުރުމަށް އެކުލަވައިލާފައިވާ ޤަވައިދުގައި ވަނީ އިމާމުންނާއި މުދިމުންގެ ހެދުން ބަލަހައްޓަންވީ ގޮތާއި ފަރުވާތެރިވާންވީ ކަންކަން ވެސް ހިމަނައިފައެވެ.

އެ ޤަވައިދުގައި ބުނެފައިވާ ގޮތުން ރަސްމީ ގަޑީގައި ހެދުން އަޅަންވާނީ އިސްލާމީ މުޖުތަމައު ބަލައިގަންނަ އަދި އިމާމުވެ ނަމާދުކުރުމަށް އެކަށީގެންވާ ފަދަ ގޮތަށެވެ. އަދި ޖިންސާއި ޓީޝާޓު ލައިގެން ނަމާދު ނުކުރުމަށާއި ގަޔަށް ބާރު ހެދުން ލައިގެން އިމާމުވެ ނަމާދު ނުކުރުމަށް އެ އުސޫލުގައި ހިމަނާފައިވެއެވެ.

ހަމައެއާއެކު ބަންގި ގޮވުމާއި އިމާމުވެ ނަމާދުކުރާއިރު ބޮލުގައި އެއްޗެއް އެޅުމަށް ފަރުވާތެރިވުމަށް ވެސް މި އުސޫލުގައި ބުނެފައިވެއެވެ.

މީގެއިތުރުން، އިމާމުންނާއި މުދިމުންނަކީ ސާފުތާހިރުވެގެން ތިބޭ ބަޔަކަށް ވާންޖެހޭނެކަމަށާއި މިސްކިތަށް އަންނަ ފަރާތްތަކާއި މުޖުތަމައުގެ އާންމު ފަރުދުންނާއި މުއާމަލާތްކުރުމުގައި އިޖުތިމާއީ ހަމަތަކުގެ މަތިން ރީތި ބަހުން ވާހަކަ ދައްކަންޖެހޭނެކަމަށް ވެސް އެ އުސޫލުގައި ވަނީ ކަނޑައަޅައިފައެވެ. އަދި އެހެން މީހުންނަށް ނަމޫނާ ބަޔަކަށް ވުމާއި ރަސްމީ ހައިސިއްޔަތުންނާއި އަމިއްލަ ހައިސިއްޔަތުން ކުރާ އެއްވެސް ކަމަކުން ނުވަތަ ދައްކާ ވާހަކައަކުން ވެސް އިމާމުންގެ ގަދަރާއި ހައިބަތާއި އިތުބާރު ގެއްލޭ ފަދަ ކަންކަމުން ދުރުހެލި ވުމަށް މި އުސޫލުގައިވެއެވެ.

މުދިމުންގެ ޤަވައިދުގައި ވަނީ ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި އެ ގާނޫނުގެ ދަށުން އެކުލަވާލާފައިވާ ގަވައިދުތަކާ ހިލާފަށް އެއްވެސް އަމަލެއް ނުހިންގުމަށާއި އެފަދަ ކަންކަމުގައި ބައިވެރި ނުވުމަށް އަދި ދީނީ ގޮތުން ހިލާފު އުފެދޭ ކަންކަމުގައި އަމަލުކުރުމުގައި މިނިސްޓްރީން ކަނޑައަޅާފައިވާ މިންގަނޑު ހިފެހެއްޓުމަށް އަންގައިފައެވެ.

މި އުސޫލުގައިވާ ކަންކަމާ ހިލާފުވެއްޖެ ނަމަ، އެކަމެއްގެ ކުޑަ ބޮޑު މިނަކަށް ބެލުމަށް ފަހު، ސިވިލް ސާވިސް ގަވާއިދުގެ ދަށުން ފިޔަވަޅު އެޅުމުގެ ބާރު ވެސް އިސްލާމިކް މިނިސްޓްރީއަށް ލިބިގެންވެއެވެ.