ރާއްޖޭގެ ޞިއްޙީ ދާއިރާއަށް ކުރިއެރުމާއި ތަރައްޤީ އަންނަމުން ދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމަށް ދެއްވާ ޚާއްޞަ އަހަންމިއްޔަތުކަމުގެ ސަބަބުންކަމަށް މާލޭ ގުރޫޕް އޮފް ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް މިރޭ ވިދާޅުވެއްޖެއެވެ.

ދަރުމަވަންތަ ހޮސްޕިޓަލް ޓަރޝަރީ ފެންވަރަށް ތަރައްޤީކޮށް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ހަލީމް ވިދާޅުވީ ޕީޕީއެމްގެ ސަރުކާރުގައި ދަރުމަވަންތަ ހޮސްޕިޓަލްގެ ބޮޑުބައި ނިމިފައިވީ ނަމަވެސް، މިދިޔަ އެމްޑީޕީގެ ސަރުކާރުގައި އެ ހޮސްޕިޓަލަށް ވަރަށް ބޮޑަށް އިހުމާލުވެފައިވާ ކަމަށެވެ. އެގޮތުން 25 ފަންގިފިލާއަށް ތަރައްޤީކޮށްފައިވާ ހޮސްޕިޓަލްގެ ބައެއް ފަންގިފިލާތައް މިހާތަނަށް އައިރު ބޭނުންކޮށްފައިނުވާކަން ސީއީއޯ ފާހަގަކުރެއްވިއެވެ.

ނަމަވެސް، ރައީސް މުޢިއްޒު ވެރިކަމާ ހަވާލުވެވަޑައިގަތުމަށްފަހު ދަރުމަވަންތަ ހޮސްޕިޓަލް މަރާމާތުކޮށް އެތަނަކީ ދިވެހި ޞިއްޙީ ދާއިރާގެ މައި ހޮސްޕިޓަލުކަމުގައި ހެއްދެވުމުގެ މަސައްކަތް ފައްޓަވާފައިވާކަމަށް ޢަބްދުއްރައްޒާޤު ޙަލީމް ވިދާޅުވިއެވެ. އެގޮތުން އެތަނުގައި ހުރި ގިނަ މައްސަލަތަކެއް ހައްލުކޮށް، މަރާމާތުކުރަންޖެހޭ ވަޞީލަތްތައް މަރާމާތުކުރުމުގެ އިތުރުން ޒަމާނީ ވަޞީލަތްތައް ހޯދައި، ޒަމާނީ އެތައް ޚިދުމަތެއް މިހާރު ލިބޭނެ ކަމަށް އޭނާ ވިދާޅުވިއެވެ.

ޢަބްދުއްރައްޒާޤު ޙަލީމް އިތުރަށް ވިދާޅުވީ ޞިއްޙީ ދާއިރާއާމެދު ރައީސް މުޢިއްޒު ގެންގުޅުއްވަނީ އުންމީދީ ތަޞައްވުރެއްކަމަށާއި ރަނގަޅު ޞިއްޙީ ނިޒާމެއް ޤާއިމްކުރަން އެމަނިކުފާނު ޚާއްޞަ އިސްކަމެއްދެއްވާ ކަމަށެވެ. އަދި ރާއްޖޭގައި ދަރިމައިވުމުގެ މައްސަލަ ދިމާވާ މީހުންނަށް ފަރުވާކުރެވޭނެ ޒަމާނީ ފެންވަރުގެ ފާޓިލިޓީ ސެންޓަރެއް ޤާއިމްކުރުމަކީ ރައީސުލްޖުމްހޫރިއްޔާގެ ވަޢުދުފުޅެއް ކަމަށާއި އެ ވަޢުދުފުޅު މިއަދު ހަޤީޤަތަކަށްވެއްޖެ ކަމަށް ޢަބްދުއްރައްޒާޤު ހަލީމް ވިދާޅުވިއެވެ.

ދަރުމަވަންތަ ހޮސްޕިޓަލުގައި މިހާރު ކޮށްފައިވާ މަސައްކަތްތަކުގެ ތަފްޞީލު ދެއްވަމުން، ޢަބްދުއްރައްޒާޤު ޙަލީމް ވިދާޅުވީ މިދިޔަ ސަރުކާރުން ދޫކޮށްލާފައި އޮތް ފަސް ފަންގިފިލާ މަރާމާތުކޮށް، އެތަނުގެ ބޭނުން އެންމެ ރަނގަޅުގޮތުގައި މިހާރު ހިފަން ފަށާފައިވާ ކަމަށެވެ.

މި ރަސްމިއްޔާތުގައި ދަރުމަވަންތަ ހޮސްޕިޓަލުގެ އާ ޚިދުމަތްތައް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މި ރަސްމިއްޔާތުގައި ޞިއްޙީ ދާއިރާގެ އިސްވެރިންނާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.

ދަރުމަވަންތަ ހޮސްޕިޓަލް ޓަރޝަރީ ފެންވަރަށް ތަރައްޤީކުރުމަކީ ރާއްޖޭގެ ޞިއްޙީ ދާއިރާއަށް ލިބިގެންދިޔަ ވަރަށް ބޮޑު ކުރިއެރުމެއްކަމަށް ޞިއްޙީ ދާއިރާގެ މާހިރުން ދެކެއެވެ.