ދިވެހި ރާއްޖޭގައި ކުއްލި ހާލަތްތަކުގައި އެހީތެރިކަމާއި ރައްކާތެރިކަމަށް އެދި ގުޅުމަށް "ޝޯޓްކޯޑް ލައިން" 911 ރޭ ފެށިގެން ބޭނުންކުރަން ފަށައިފިއެވެ.

މި ޚިދުމަތް ފެށުމަށް ބޭއްވި ރަސްމިއްޔާތުގައި ހޯމް މިނިސްޓަރު އަލީ އިހުސާން ވިދާޅުވީ މިއަދަކީ ރާއްޖެ ރަން އަކުރުން ފަވާލެވޭނެ ދުވަހެއް ކަމަށެވެ.

މި ޚިދުމަތް ފެށުމަށް ނިންމީ ރައީސް ޑރ. މުހައްމަދު މުއިއްޒުގެ ވެރިކަމުގެ ކުރީކޮޅުގައި ކަމަށް މިނިސްޓަރު ވިދާޅުވިއެވެ. މި ޚިދުމަތް ގާއިމުކޮށްފައި ވަނީ މޯލްޑިވްސް ޕޮލިސް ސަރވިސްގައެވެ. 911 އަކީ ޕޮލިހަށް ކަމެއް ރިޕޯޓުކުރުމާއި، އެމްބިއުލާންސް، ކޯސްޓްގާޑް އަދި ފަޔަރ އެންޑް ރެސްކިއު ޚިދުމަތްތައް ހޯދުމަށް ގުޅޭނެ ނަންބަރެވެ.

މިނިސްޓަރު އިހުސާން ވިދާޅުވި ގޮތުގައި 911 ނަންބަރު އިޚްތިޔާރުކުރީ އެއީ ގިނަ މީހުންނަށް އަދި ކުޑަކުދިންނަށް ވެސް ފަސޭހައިން ހަނދާން ބެހެއްޓޭނެ ނަންބަރަކަށް ވާތީއެވެ. އަދި މީޑިއާ އާއި ފިލްމުތަކުން ވެސް މި ނަންބަރު ފެންނަމުންދާތީ، ގިނަ ރައްޔިތުންނަށް ހަނދާނުގައި ބެހެއްޓުމަށް ފަސޭހަވާނެ ކަމަށް ބެލެވޭތީއެވެ.

މި ޚިދުމަތުގެ ފެންވަރު އިތުރަށް ރަނގަޅުކުރުމަށް ގިނަ މަސައްކަތްތަކެއް ކުރިއަށްދާނެ ކަމަށް މިނިސްޓަރު ވިދާޅުވިއެވެ. މީގެ ތެރޭގައި ކޮމިއުނިކޭޝަން ސިސްޓަމްތައް އެޑްވާންސްކުރުމާއި، ޖީއައިއެސް މެޕިންގ ނިޒާމަކަށް ބަދަލުކުރުމާއި، ޑިސްޕެޗް ސޮފްޓްވެއަރ ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން ބޭނުންކުރެވޭނެ ގޮތް ހެދުން ހިމެނެއެވެ. އަދި ރެސްޕޮންސް ޓައިމް އަވަސްކުރުމާއި، މުވައްޒަފުންގެ ޤާބިލުކަން އިތުރުކުރުމަށް ތަމްރީނުތައް ދިނުން ވެސް ހިމެނެއެވެ.

މިނިސްޓަރު އިހުސާން ވަނީ އާންމުންނަށް މި މުހިންމު ޚިދުމަތް ނަހަމަ ގޮތުގައި ބޭނުން ނުކުރުމަށް އިލްތިމާސް ކުރައްވައިފައެވެ. ކުއްލި ހާލަތްތަކުގައި ގުޅުމަށް ގިނަ ޤައުމުތަކުގައި ބޭނުންކުރާ އިމަޖެންސީ ނަންބަރަކީ ވެސް 911 އެވެ.